बाढीले क्षति पुर्‍याएको काबेली करिडोर प्रसारण लाइनको पुनर्निर्माण सम्पन्न, १९ प्रसारण लाइन सञ्चालन

काठमाडौं : इलामको माइखोला आएको बाढीले क्षति पुर्‍याएको काबेली करिडोर १३२ केभी डबल सर्किट प्रसारण लाइनको पुनर्निर्माण सम्पन्न भएको छ। गत असोज १२ गते शनिबार माइखोलामा आएको बाढीले काबेली करिडोर प्रसारण लाइनअन्तर्गत इलामको माइ नगरपालिका-१ र ७ स्थित धोद्रेबेंसीमा ४ वटा टावरमा क्षति पुर्‍याएको थियो।

नेपाल विद्युत प्राधिकरण र काबेली करिडोर प्रसारण लाइनमा विद्युत् जोडिएका निजी क्षेत्रका २० जलविद्युत आयोजनाहरूले संयुक्त रूपमा पुनर्निर्माण तथा पुनर्स्थापना गरी सोमबार दिउँसो साढे ४ बजेबाट प्रसारण लाइन सञ्चालनमा ल्याएका हुन्। काम सुरु गरेको १९ दिनमा काम सम्पन्न गरी प्रसारण लाइन सञ्चालनमा ल्याइएको निजी क्षेत्रका तर्फबाट पुनर्निर्माणमा खटिएका ऊर्जा उद्यमी मोहन कार्कीले बताए।

प्रसारण लाइन सञ्चालनमा आएसँगै ताप्लेजुङ, पाँचथर र इलाममा सञ्चालनमा रहेका आयोजनाहरूले विद्युत् उत्पादन सुरु गरेका छन्। आयोजनाहरूबाट असोज १२ गतेबाट विद्युत् उत्पादन बन्द थियो। प्राधिकरण र निजी क्षेत्रले संयुक्त रूपमा नमुनाका रूपमा पुनर्निर्माण अगाडि बढाएका थिए। प्राधिकरणले प्रसारण लाइनका पाटपूर्जाहरू लगायतका सामग्रीहरू उपलब्ध गराएको छ। निजी क्षेत्रका जलविद्युत आयोजनाहरूले श्रम लागत लगायतका खर्च बेहोरेका छन्। यसका लागि प्रत्येक आयोजनाले निश्चित रकम योगदान गरेका छन्। निजी क्षेत्रले कार्कीको नेतृत्वमा टोली खटाएका थिए।

काबेली करिडोर प्रसारण लाइनअन्तर्गत इलामको गोदकबाट झापाको दमकसम्मको  खण्डको धोद्रेबेंसीमा ५०, ५१, ५२ र ५३ नम्बर टावरलाई माइखोलाको बाढीले क्षति पुर्‍याएको थियो। त्यस स्थानबाट प्रसारण लाइनलाई माइखोला पार गराएको थियो। उक्त स्थानमा प्रसारण लाइनको स्पान साढे सात सय मिटर रहेको छ।

चारवटा टावरमध्ये बाढीले ५१ र ५२ नम्बर टावरलाई पूर्ण रूपमा क्षति पुर्‍याएको थियो। बाढीले उक्त टावर ढालेको थियो। त्यहाँ अर्को नयाँ टावर बनाइएको हो। ५० र ५३ नम्बर टावरमा आंशिक क्षति पुगेको थियो। ५० नम्बर टावरको टुप्पोको संरचनामा क्षति पुगेको थियो। ५३ नम्बर टावरको क्रस आर्म र टुप्पोको संरचनामा क्षति पुगेको थियो। दुवै टावरको मर्मत गरिएको थियो। प्रसारण लाइन पुनर्निर्माणमा उक्त स्थानका वडाका जनप्रतिधिहरूबाट पूर्ण रूपमा सहयोग प्राप्त भएको थियो।