ढल्केवर(धनुषा) : छठ पर्वको दोस्रो दिन आज खरना विधि गरिँदैछ । सत्य र अहिंसा प्रति मानवको रुचि बढाउने र सबै जीवप्रति सहानुभूति राख्न अभिप्रेरित गर्ने तराईबासीको महान् चाड छठ मंगलबारबाट विधिवत् रुपमा सुरु भएको हो ।
कात्तिक शुक्लपक्षमा चार दिनसम्म मनाइने छठपर्वको तराई-मधेसमा यतिबेला अलग्गै रौनक छाएको छ । छठपर्व मनाउनेहरु पोखरी, नदी, तलाउलगायतका जलाशयहरुलाई सरसफाई गरी सजावट गर्नमा व्यस्त छन् । जलाशयहरूलाई दुलही झैं सिंगारिने काम भइरहेको छ ।
छठपर्वको पहिलो दिन मंगलबार नहायखाय विधि सम्पन्न गरिएको छ । कात्तिक महिनाको शुक्ल पक्षको चतुर्थी तिथिका दिन बिहान ब्रतालुहरुले बिहानै नहायखाय विधि अर्थात नुहाएर खाएका थिए । त्यो दिन ब्रतालुहरुले नुहाइ धुवाइ गरि चोखो भइ प्याज र लसुनसमेत नमिसाइएको शुद्ध शाकाहारी भोजन ग्रहण गर्छन् ।
कात्तिक शुक्लपक्षको पञ्चमी तिथि अर्थात् पर्वको दोस्रो दिन आज खरना विधि गरिँदैछ । खर्नाका दिन ब्रतालु महिला र पुरुषहरुले दिनभरि उपवास बसेर साँझ दूध, चामल र सख्खर हालेर पकाइएको खिर, केरालगायत विभिन्न फलफूल तथा मिठाइ सजाएर छठ देवतालाई आगमनको निम्तो दिँदै कुल देवताको पूजा गरिसकेपछि व्रतालुसहित घरपरिवारका सबै सदस्य त्यही सामग्री प्रसादका रूपमा ग्रहण गर्छन् । यसरी खरना विधि सम्पन्न हुन्छ ।
त्यस्तै षष्ठी तिथि अर्थात् पर्वको तेस्रो दिन अस्ताउँदो सूर्य र सप्तमी तिथिमा उदाउँदो सूर्यलाई अर्घ दिई छठ पर्व विधिवत रुपमा समापन हुन्छ । अत्यन्तै निष्ठा र कठोर पर्वको रुपमा मानिने छठमा ब्रतालुहरु खरनाको दिनदेखि निराहार ब्रत बस्छन् ।
प्रतिक्रिया दिनुहोस !
