इजरायलले बुधबार लेबनानको राजधानी बेरुतको अन्तर्राष्ट्रिय विमानस्थललाई निशाना बनाएको छ । यसबाहेक बेरुत र बेका उपत्यकाका विभिन्न भागमा पनि हवाई हमला गरिएको थियो। यी आक्रमणमा ४० जनाभन्दा बढीको मृत्यु भएको छ भने ५० भन्दा बढी घाइते भएका छन् ।
समाचार एजेन्सी पीटीआईका अनुसार आक्रमण हुनुअघि इजरायली रक्षा बल (आईडीएफ) ले एयरपोर्ट र आसपासका क्षेत्रहरू खाली गर्न भनेको थियो। आइडीएफले बेरुतमा हमलाको क्रममा हिजबुल्लाहको कमाण्ड सेन्टर र हतियार डिपोलाई निशाना बनाएको दाबी गरेको छ।
यसअघि मङ्गलबार अबेर राति पनि इजरायलले लेबनानको बर्जा सहरको एउटा अपार्टमेन्ट भवनमा हवाई आक्रमण गरेको थियो । जसमा करिब ३० जनाको मृत्यु भएको थियो । आईडीएफले आक्रमण गर्नुअघि कुनै चेतावनी समेत दिएको थिएन।
अर्कोतर्फ गाजामा पनि इजरायली सेना बेत लाहिया पुगेका छन् । अहिलेसम्म आइडीएफले त्यहाँ बम विष्फोट मात्र गरिरहेको थियो । इजरायलका अनुसार हमासका आतंककारीहरू फेरि यस क्षेत्रमा जम्मा हुन थालेका छन्।
लेबनानमा ३ हजारभन्दा बढीको मृत्यु
इजरायली आक्रमणका कारण पछिल्लो एक वर्षमा ३ हजारभन्दा बढी लेबनानी नागरिक मारिएका छन् । विगत ६ हप्तादेखि जारी इजरायल-लेबनान युद्धमा तीमध्ये अधिकांश मारिएका हुन्। युद्धका कारण लेबनानका १० लाखभन्दा बढी मानिसले आफ्नो घर छाड्नुपरेको छ ।
अधिकांश मानिसहरू राहत शिविरमा शरण लिएका छन्। अहिले ती शिविरमा पनि ठाउँ छैन । त्यसैले समुन्द्रको किनारमा पाल टाँगेर मानिसहरुलाई अस्थायी रुपमा बस्न दिइएको छ ।
हिजबुल्लाह प्रमुख नइम कासिमले बुधबार इजरायलसँग युद्धविराम वार्ता गर्ने इच्छा व्यक्त गरेका छन् । उनले वार्ता अघि इजरायली आक्रमण रोक्न आग्रह गरेका छन् ।
प्रतिक्रिया दिनुहोस !
