काठमाडौं : काठमाडौंको चाबहिलमा रहेको एक इन्टेरियर गोदाममा आगलागी हुँदा लाखौंको क्षति भएको छ। आइतबार मध्यान्ह चाबहिलको सरस्वतीनगरस्थित इन्टेरियर गोदाममा आगो लागेको हो।
आगलागीका कारण गोदाममा रहेको फर्निचर, सजावटका सामाग्री, विधुतिय सामाग्री, प्लाई लगायतका सामाग्री जलेर नष्ट भएको छ। आगलागीले वरपरका अन्य घरहरूमा समेत केहि क्षति पुर्याएको छ।
आगलागी भएपछि सेना, प्रहरी, सशस्त्र प्रहरी लगायत उपत्यकाका तीनै जिल्लाका बारुण यन्त्रको सहायताले करिब दुई घण्टापछि नियन्त्रणमा लिएको थियो।
इन्टेरियर कम्पनी आटर्स इन्टरनेशनल प्रालिका सञ्चालन सञ्जिव भण्डारीले आगालागीका समयमा गोदाममा कोही कामदार नभएको र कसरी आगो लाग्यो भन्ने अन्योलमा रहेको बताए। आगलागीका कारण ठूलो क्षति भएको उनले बताए।
आगलागका कारण भएको क्षतिको यकिन विवरण आउन बाँकी रहेको प्रहरीले जनाएको छ।
प्रतिक्रिया दिनुहोस !
