बागलुङ : बागलुङको जैमिनी नगरपालिका–७ जैदीमा भएको जीप दुर्घटनामा मृत्यु भएका पाँचै जनाको सनाखत भएको छ।
सोमबार बिहान जैमिनी नगरपालिका–८ छिस्तीबाट सदरमुकाम बागलुङ बजार आउँदै गरेको ग २ च ९२४७ नम्बरको पीकअप भ्यान जैमिनी–७ जैदीको हर्देवा पाखाको भित्रि सडकमा दुर्घटना हुँदा पाँच जनाको घटनास्थलमै मृत्यु भएको थियो।
दुर्घटनामा जैमिनी नगरपालिका–८ छिस्ती केवईका ३८ वर्षीय महेन्द्र पुन, सोही ठाउँकी २० वर्षीय रश्मी श्रीस, ५० वर्षीया नन्दकली पुन, १७ वर्षीय निरज श्रीस र ७५ वर्षीय कुल प्रसाद श्रीसको मृत्यु भएको जिल्ला प्रहरी कार्यालय बागलुङका प्रहरी नायव उपरीक्षक (डीएसपी) विजय यादवले जानकारी दिए।
दुर्घटनामा छिस्ती केवईकै ४५ वर्षीय गंगा बहादुर श्रीस घाइते भएका छन्। उनको शरीरको विभिन्न भागमा चोट लागेको र अवस्था मध्यम रहेको डीएसपी यावदले बताए। घाइतेलाई धौलागिरी अस्पतालमा उपचारको लागि ल्याइँदै छ। जीप सडकदेखि ५ सय मिटर तल खसेको स्थानीयले बताए।
प्रतिक्रिया दिनुहोस !
