सहकारी ठगी प्रकरण : अनुसन्धान गर्न पूर्वगृहमन्त्री लामिछानेलाई रुपन्देही ल्याइँदै
कात्तिक २७, २०८१ मंगलबार १०:४५:१
भैरहवा : राष्ट्रिय स्वतन्त्र पार्टीका सभापति रवि लामिछानेलाई रुपन्देही ल्याइदैँछ । रुपन्देहीको सुप्रिम बचत तथा ऋण सहकारीको रकम अपचलनको आरोपमा अनुसन्धानका लागि रुपन्देही ल्याउन लागिएको हो ।
जिल्ला प्रहरी कार्यालय कास्कीको हिरासतमा रहेका सभापति लामिछानलाई मंगलबार बयानका लागि रुपन्देही ल्याउन लागिएको हो । पोखराबाट बिहान ७:४५ बजेको बुद्ध एयरको फ्लाईटमा रुपन्देही ल्याउने तालिका भएपनि मौसमका कारण भैरहवा विमानस्थल बन्द रहेकोले पोखराबाट विमानले उडान भरेको छैन ।
रविलाई विमानस्थलबाट जिल्ला प्रहरी कार्यालय लैजाने र त्यसपछि जिल्ला सरकारी वकिल कार्यालयमा बयानका लागि लैजाने तालिका रहेको प्रहरी स्रोतले जनाएको छ ।
भैरहवा विमानस्थल बाहिर रास्वपाका नेता, कार्यकर्ता जम्मा भएका छन् । सुरक्षा व्यवस्थालाई मध्यनजर गर्दै उनीहरूलाई विमानस्थलभित्र प्रवेशमा रोक लगाइएको छ । साथै, भैरहवा विमानस्थलमा कडाईका साथै भैरहवामा सुरक्षा व्यवस्था कडा बनाइएको छ ।
प्रतिक्रिया दिनुहोस !
