२ महिनाको सुत्केरी सीताले सुत्ने कोठामा कोइला बालेको फेला परेको छ। कोइलाको कारण निस्सासिएर तीनै जनाको मृत्यु भएको हुन सक्ने पनि प्रहरीको अनुमान छ।
काठमाडौं : कात्तिक २९ गते दिउँसो प्रहरी वृत्त बौद्धमा एउटा निवेदन दर्ता भयो । निवेदनमा उल्लेख विवरण भने अलि शंकास्पद थियो । निवेदनमा गोकर्णेश्वर बस्ने ३३ वर्षकी सीता दंगाल कात्तिक १६ गतेदेखि बेपत्ता भएको उल्लेख थियो । साथमा १५ वर्षकी छोरी र २ महिने छोरा पनि बेपत्ता भन्दै खोजबिनका लागि निवेदन दिइएको थियो ।
निवेदन दिने थिए, सीताका पति ४९ वर्षीय कान्छा नगरकोटी । निवेदन विवरणअनुसार १३ दिनअघि हराएका पत्नी, छोरा, छोरी खोज्न कान्छा नगरकोटी बिहीबारमात्रै प्रहरीकहाँ पुगेका थिए । जिल्ला प्रहरी परिसर काठमाडौंका प्रवक्ता नवराज अधिकारीका अनुसार नाबालकसहित महिला हराएपछि प्रहरी वृत्त बौद्धको टोली खोजतलासका लागि तुरुन्तै परिचालन भयो ।
प्रहरी टोली कान्छा नगरकोटीको घरमा गएर खोजी गर्दा उनको श्रीमती सुत्ने कोठाभित्र सडेगलेको अवस्थामा तीनवटा शव फेला प¥यो । सीता दंगाल, उनको छोरी अंशु मोक्तान र दुई महिनाको नाबालक छोरा मृत अवस्थामा भेटिएका थिए । तीनैजना बिस्तारामा सुतेको अवस्थामा मृत फेला परेका हुन् । शव सडेगलेको र गन्ध आएको अवस्थामा भेटिएको थियो । शव भेटिएको कोठा भित्रबाट लक गरेको अवस्थामा छ । प्रहरीले उक्त कोठाको ढोका फोडेर खोजतलास गरेको थियो ।
प्रहरी वृत्त बौद्धले दिएको जानकारीअनुसार, मृतकको शव हेर्दा भवितव्य मृत्युजस्तो देखिन्छ । तर घरधनी कान्छा नगरकोटीले श्रीमती हराउनासाथ किन कसैलाई खबर गरेनन् ? यो बीचमा उनी कहाँ कता गए ? श्रीमतीको कोठामा किन खोजी गरेनन् ? मृतक तिनै जनाको शव कुहिएर गन्ध आउँदासमेत घरमा बस्नेले पत्तो नपाउनु अलि शंकास्पद देखिएकाले उनलाई नियन्त्रणमा लिएर प्रहरीले अनुसन्धान अगाडि बढाएको छ ।
कान्छा नगरकोटीले आफू सुत्ने कोठामा चाबी लगाएर यतायता हिँड्ने गरेका थिए । प्रहरीको प्रारम्भिक अनुसन्धानका क्रममा कान्छा नगरकोटीले श्रीमतीसँग कहिलेकाहीँ विवाद हुने गरेको बताएका छन् । अरूबेला पनि श्रीमतीले घरमा साँचो लगाएर चाबी बोकेर हिँड्ने गरेकाले कतै गइन् होला भन्ने सोचेर आफू चुप बसेको बताएका छन् ।
कान्छाले हराएको भनेको मितिमै उनीहरूको मृत्यु भएको प्रहरीको अनुमान छ । शवको पोस्टमार्टमका लागि त्रिवि शिक्षण अस्पताल महाराजगन्जमा पठाइएको छ । यसको रिपोर्ट आएपछि मात्रै मृत्युको कारण खुल्ने प्रहरी प्रवक्ता अधिकारी बताउँछन् ।
दुई महिनाको सुत्केरी सीताले सुत्ने कोठामा कोइला बालेको फेला परेको छ । कोइलाको कारण निस्सासिएर तीनै जनाको मृत्यु भएको हुन सक्ने पनि प्रहरीको अनुमान छ । हराउनु दुई दिनअघि सीता आफूले गर्दै गरेको काममा गएको सूचना प्रहरीले फेला पारेको छ । सीता र कान्छा दुवैले एकअर्कासँग दोस्रो विवाह गरेका हुन् । मृत भेटिएकी अन्सु सीताको पहिलो श्रीमान्तर्फको छोरी हुन् । कान्छाको पनि एक छोरा रहेको र छुट्टै बस्ने गरेको प्रहरीले जानकारी दिएको छ ।
सीता र कान्छाको भर्खरै मात्रै छोरा जन्मिएका थिए । श्रीमती हराएपछि कान्छाले गाउँमा गएर श्रीमतीले अर्कैसँग बिहे गरेर गएको हल्ला गरेका थिए । घटना केही शंकास्पद देखिए पनि हत्या नै भएको भन्ने प्रमाण भने फेला परेको छैन । घटनाबारे प्रहरी वृत्त बौद्धले अनुसन्धान गरिरहेको छ ।
प्रतिक्रिया दिनुहोस !
