विराटनगर : मोरङको ग्रामथान गाउँपालिका–२ का ६१ वर्षीय मंगलु सरदारलाई यतिबेला पाकेको धान थन्क्याउन भ्याइनभ्याइ छ ।
उनी प्रत्येक दिन परिवारका सदस्यसहित खेतमा पुग्छन् । दिनभर धान काटेर फर्कन्छन् । केही दिनयता उनको दैनिकी यसरी नै बितिरहेको छ । गाउँमा चुनाव आउँदैछ गरेको कुरा पनि थाहा छ । तर, त्यो चुनावले उनलाई छुन सकेको छैन ।
चुनावभन्दा पनि वर्षभरि खाने धान थन्क्याउने चिन्ता उनलाई छ । ‘चुनाव त लाग्यो । तर, हामीलाई धान थन्क्याउने चटारो छ । पाकेको थान बेलैमा काटेन भने थन्क्याउन पाइँदैन कि भन्ने तनाव हुन्छ । चरा र मुसाले सक्न लाग्यो । मौसमले साथ दिएन भने हाम्रो त बिल्लीबाठ हुन्छ । काम छाडेर चुनावमा जाने सम्भावना छैन,’ उनले भने ।
अर्कोतर्फ दिन धुम्म हुन थालेकाले पनि धान थन्क्याउन पाइँदैन कि भन्ने पिरलो रहेको मंगलु सुनाउँछन् । ‘दिन धुम्म हुँदैछ । केही दिनदेखि राम्ररी घाम लागेको छैन । खेतभरि धान काटेर छाडेका छौं । पानी प¥यो भने सबै भिजाइदिन्छ । हाम्रो मेहनत त्यत्तिकै खेर जान्छ । अहिले अरू कुरालाई वास्ता नगरिकन धान थन्क्याउनु छ,’ उनी भन्छन् ।
ग्रामथानकै ठकनीदेवी सरदारलाई पनि पाकेको धान थन्क्याउने हतारो छ । ‘हुन त हाम्रै जनप्रतिनिधि छान्नुपर्ने हो । राम्रो मान्छेलाई जनप्रतिनिधि बनाउनुपर्छ भन्ने लाग्छ । चुनाव लागिसक्यो । तर, धान थन्क्याउने हतारोले अरू कुरामा ध्यान दिन पाएकै छैन,’ उनले भनिन् ।
धान नथन्क्याएसम्म अरू कुरामा ध्यान दिन नसकिने उनले बताइन्् । ठकनीदेवी आफ्नो र गाउँको पीडा बुझिदिने नेताले चुनाव जितोस् भन्ने पक्षमा छिन् । वर्षा भयो भने पाकेको बालीलाई नोक्सान पु¥याउने डरले आकाश हेर्दै धान भित्राउनुपर्ने हतारोा आफूहरू रहेको उनले बताइन्् । उनका अनुसार उम्मेदवार भोट माग्न खेतमै आइरहेका छन् ।
मंगलु र ठकनीदेवी मात्रै हैन, ग्रामथानका किसान अहिले धान बाली भित्राउन निक्कै व्यस्त छन् । गाउँपालिकाको अध्यक्ष चयनका लागि आगामी मंसिर १६ गते उपनिर्वाचन हुँदै छ । चुनाव नजिकिँदै जाँदा उम्मेदवारलाई भने भोट माग्ने चटारो छ । तर, मतदातालाई भने बाली थन्क्याउने हतारो छ । मौसम प्रतिकूल भइदियो भने वर्ष दिनभरि खाने धान स्वाहा हुन्छभन्ने चिन्ता उनीहरू छन् । कृषकको अहिले मानो खाएर मुरी भित्राउने मुख्य सिजन हो । त्यसैले धेरैजसो मतदाता खेतमै व्यस्त छन् । खेतबारीमा व्यस्त किसानहरू अब चुनाव जित्नेले कृषि क्षेत्रलाई प्राथमिकता दिएर काम गर्नुपर्ने बताउँछन् ।
गाउँमै रोजगारीको सिर्जना गर्नेदेखि स्थानीयका पिरमर्का र गाउँका समस्या बुझिदिने व्यक्तिले चुनाव जित्नुपर्ने ग्रामथानको नेता चोकका गणेश कार्कीले बताए बताए । उनका अनुसार पछिल्लो समय नेताहरू अनेक अनियमिततामा मुछिने गरेका छन् । तर, अबको निर्वाचनबाट गाउँको समस्या बुझिदिने र असल नेता चुनिनुपर्ने कार्की बताउँछन् । समाज र जनताका लागि काम गर्ने नेताको खाँचो रहेको उनको भनाइ छ । ‘अब नागरिक सचेत भइसकेका छन् । जसले काम गर्न सक्छ, जसको भिजन छ, उसैलाई मत दिने हो । अब भाषण सुनेर भोट हाल्ने जमाना गए,’ कार्की भन्छन् । ग्रामथानमा चुनावी सरगर्मी बढेको छ । राजनीतिक दलका नेता र उम्मेदवार यतिबेला घरदैलोमा व्यस्त छन् । मतदाता रिझाउँदै गाउँ–गाउँ, बस्ती–बस्ती र कृषकका खेतबारीमा पुगिरहेका छन् ।
उम्मेदवार तथा नेता कार्यकर्ताले प्रचार सामग्रीसहित खेतमै पुगेर भोट माग्ने गरेका हुन् । ग्रामथान किसानहरूको बसोबास बढी भएको पालिका हो । कामको मुख्य याम भएकाले यतिबेला कृषकलाई पाकेको धान थन्क्याउन भ्याइ नभ्याइ हुनु स्वभाविक नै हो ।
उम्मेदवार भने आआफ्नो एजेन्डासहित मतदातालाई फकाउन व्यस्त छन् । खेतमै पुगेर मत दिँदै आफूलाई जिताउन आग्रह गर्छन्् । खेतमै पुगेर भोट माग्नेमध्येका एक हुन् नेकपा (एमाले)बाट गाउँपालिकाको अध्यक्षका उम्मेदवार तुलसीराम विश्वास ।
एमाले ग्रामथानको उपाध्यक्षसमेत रहेका उनले चुनाव लक्षित घरदैलोलाई तीव्र पारेका छन् । त्यस क्रममा शनिबार खेतमै पुगेर भोट मागिरहेको भेटिए । ‘चुनाव आइसकेकाले घरदैलोमा व्यस्त छु । हाम्रो गाउँपालिकामा कृषि पेशामा आवद्ध भएकाहरूको बसोबास धेरै छ,’ विश्वासले भने, ‘कामको पनि सिजन भएकाले अधिकांश मतदाता खेतबारीमै भेटिन्छन् । आफ्नो एजेन्डासहित खेतमै पुगेर भोट माग्ने गरेको छु । मतदातालाई विश्वासमा लिइरहेको छु ।’
चुनावी अभियानका क्रममा आफूले मतदाताको समस्या नजिकबाट नियाल्न पाएको उनले सुनाए । ‘यहाँका कृषकले सधैंं बिउ, मलदेखि सिँचाइसम्मका समस्या भोगिरहेका छन् । शिक्षादेखि स्वास्थ्यका समस्या त छँदै छन् । मैले चुनाव जितेपछि सबै समस्याको समाधान गर्नेगरी काम गर्छु । नयाँ ढंगले जनताका पक्षमा काम गर्ने योजना बनाएको छु । कृषकको पीडा मैले नजिकबाट बुझेको छु,’ विश्वासले भने ।
ग्रामथानको अध्यक्षका लागि एमालेबाट तुलसीराम विश्वाससहित नेपाली कांग्रेसबाट बलराम सरदार, नेकपा (माओवादी केन्द्र)बाट नमोनारायण माझी, राष्ट्रिय प्रजातन्त्र पार्टी (राप्रपा)बाट दिनेशकुमार थन्दार (दिवेश), नेकपा (एकीकृत समाजवादी)बाट दिलबहादुर विक उम्मेदवार छन् ।
उनीहरू आ–आफ्नो एजेन्डासहित चुनावी मैदानमा होमिएका छन् । उनीहरू सबै ग्रामथानमा भिजेका उम्मेदवारहरू हुन् । ग्रामथानमा उपनिर्वाचनका लागि १३ हजार ४१ म्हिलासहित २६ हजार ४४ मतदाता रहेका छन् ।
प्रतिक्रिया दिनुहोस !
