राजविराज : स्थानीय तह उपनिर्वाचन अन्तर्गत सप्तरीको डाक्नेश्वरी नगरपालिकाको दुई वडाको अध्यक्ष पदका लागि आइतबार स्वतन्त्र र विभिन्न पार्टीका १७ जना उम्मेदवारले मनोनयन पत्र दर्ता गरेका छन् ।
आगामी मंसिर १६ गते हुने उपनिर्वाचनका लागि डाक्नेश्वरी नगरपालिकाको रिक्त रहेको वडा नम्बर १ को वडाध्यक्ष पदका लागि दुई स्वतन्त्रसहित ९ जना र वडा नम्बर ४ मा ८ जना राजनीतिक दलले मनोनयन दर्ता गरेको मुख्य निर्वाचन अधिकृतको कार्यालय, सप्तरीले जनाएको छ ।
नेपाली कांग्रेसबाट वडा नम्बर १ को वडाध्यक्ष पदमा भुलिया देवी थरुनी र वडा नम्बर ४ को वडाध्यक्ष पदमा जोगिन्द्र राय अमातले मनोनयन दर्ता गराएका छन् । नेकपा (एमाले)बाट वडा नम्बर १ को वडाध्यक्ष पदमा भगवानी साह र वडा नम्बर ४ को वडाध्यक्ष पदमा संजयकुमार यादवले मनोनयन दर्ता गराएका छन् ।
यसैगरी नेकपा (माओवादी) केन्द्रबाट वडा नम्बर १ को अध्यक्ष पदमा प्रमोदकुमार सन्त र वडा नम्बर ४ को वडाध्यक्ष पदमा भागवत रामको मनोनयन दर्ता भएको छ । जसपा नेपालबाट वडा नम्बर १ को अध्यक्षमा धीरेन्द्रकुमार साह र वडा नम्बर ४ को अध्यक्ष पदमा देवेन्द्रप्रसाद यादवले मनोनयन दर्ता गराएका छन् ।
नागरिक उन्मुक्ति पार्टीबाट वडा नम्बर १ को वडाध्यक्ष पदमा अनरुद्वप्रसाद चौधरी र वडा नम्बर ४ को अध्यक्ष पदमा शिवकुमार रामले मनोनयन दर्ता गराएका छन् । जनमत पार्टीबाट वडा नम्बर १ को वडाध्यक्ष पदमा शैलेन्द्रकुमार साह (तेली) र वडा नम्बर ४ को वडाध्यक्ष पदमा उदय नारायण पण्डित, राष्ट्रिय प्रजातन्त्र पार्टीबाट वडा नम्बर १ को वडाध्यक्ष पदमा सतिशकुमार चौधरी थारू र वडा नम्बर ४ को वडाध्यक्ष पदमा रामकुमार यादवकोे उम्मेदवारी दर्ता भएको छ । स्वतन्त्रबाट वडा नम्बर १ मा सुशील साह र सियाकान्त चौधरीले मनोनयन दर्ता गरेका छन् भने जनता समाजवादी पार्टीबाट वडा नम्बर ४ मा रबिन्द्र रायले मनोनयन दर्ता गरेका छन् ।
नेपाली कांग्रेसबाट निर्वाचित वडा नम्बर १ का वडाध्यक्ष ६५ वर्षीय प्रितम लाल चौधरी र वडा नम्बर ४ का वडाध्यक्ष ६२ वर्षीय हरीप्रसाद रायको निधनपछि डाक्नेश्वरी नगरपालिकाको दुईवटा वडामा आगामी मङ्सिर १६ गते उपनिर्वाचन हुन लागेको हो ।
उपनिर्वाचन हुने डाक्नेश्वरी नगरपालिकाको वडा नम्बर १ मा २ हजार ६ सय ३५ र वडा नम्बर ४ मा १ हजार २ सय ८१ कुल मतदाता रहेको निर्वाचन कार्यालयले जनाएको छ । निर्वाचनका लागि कुल ३ मतदान स्थल र ५ मतदान केन्द्र तोकिएको जिल्ला निर्वाचन अधिकारी रमेश कुमार जोशीले जानकारी दिए । मंसिर १६ गते बिहान ७ बजेदेखि अपरान्ह ५ बजेसम्म मतदान हुने जिल्ला निर्वाचन कार्यालय सप्तरीले जनाएको छ ।
सप्तरीको डाक्नेश्वरी नगरपालिका–१ र ४ सहित मधेस प्रदेशमा धनुषाको धनुषाधाम नगरपालिका–१, महोत्तरीको रामगोपालपुर नगरपालिका–२, बाराको गढीमाई नगरपालिका–८ तथा रौतहटको ईशनाथ नगरपालिका–७ र राजपुर नगरपालिका–६ गरी ७ स्थानमा उपनिर्वाचन हुन लागेको छ ।
प्रतिक्रिया दिनुहोस !
