रुकुमपूर्व : रुकुमपूर्वको पुथाउत्तरगंगा गाउँपालिकाको उपनिर्वाचनमा एमालेका उम्मेदवारले कांग्रेसको चुनाव चिह्नमा उपाध्यक्ष पदमा उम्मेदवारी दिएकी छन् ।
कांग्रेस र एमालेको गठबन्धनबाट एमालेकी केशकुमारी तुलाचनले कांग्रेसको चुनाव चिह्नमा उपाध्यक्ष पदमा उम्मेदवारी दिएकी हुन् ।
यसैगरी नेकपा माओवादी केन्द्रबाट उपाध्यक्षका लागि नरपुरा बुढा पुन, नेकपा एकीकृत समाजवादीबाट सुनिता बुढामगरले उम्मेदवारी दर्ता गराउँदा स्वतन्त्रबाट कोपिला पुन बुढा, मोहनभक्त बुढा, भीमकुमारी पुन र श्रीदेवी सुनार बिक गरी उपाध्यक्ष पदमा ७ जनाले उम्मेदवारी दर्ता गराएको सहायक निर्वाचन अधिकृत ईश्वरीप्रसाद सुवेदीले जानकारी दिए ।
राजनीतिक दलसँगै स्वतन्त्रबाट पनि उम्मेदवारी दर्ता गराएका छन् । जिल्लाको पुथाउत्तरगंगा गाउँपालिकामा उपाध्यक्ष र २ नम्बर वडाको वडाध्यक्ष पदका लागि उपनिर्वाचन हुँदै छ । जसमा उपाध्यक्ष पदमा ७ जना र वडाध्यक्ष पदमा ३ जनाले उम्मेदवारी दर्ता गराएका छन् ।
त्यस्तै सहायक निर्वाचन अधिकृत सुवेदीका अनुसार २ नम्बर वडाध्यक्ष पदमा माओवादी केन्द्रबाट जगत घर्ती मगर, कांग्रेस र एमालेको गठबन्धनबाट एमालेका जीवन रोका र स्वतन्त्रबाट शुक्रराज बिकले उम्मेदवारी दर्ता गराएका हुन् ।
प्रतिक्रिया दिनुहोस !
