गोरखा : प्रसिद्ध मनास्लु क्षेत्रमा ४ महिनाको अवधिमा ६ हजारभन्दा धेरै विदेशी पर्यटकले यात्रा गरेका छन् । गतवर्षको यही समयको तुलनामा ७ सय ३७ जनाले वृद्धि भई गत साउनयता ६ हजार ४ सय २५ जनाले मनास्लु क्षेत्र भ्रमण गरेको मनास्लु संरक्षण क्षेत्र (एमक्याप) ले जनाएको छ ।
३ हजार ६ सय २९ पुरुष र २ हजार ७ सय ९५ महिला र एक अन्य गरी ६ हजार ४ सय २५ विदेशी पर्यटकले यस क्षेत्रको भ्रमण गरेका एमक्यापका सूचना अधिकारी भुवन ओझाले जानकारी दिए । गत वर्ष यही चार महिनामा जम्मा ५ हजार ६ सय ९२ विदेशी पर्यटकले यो क्षेत्रको भ्रमण गरेका थिए । यस वर्ष सार्क राष्ट्रका पर्यटक जम्मा ८९ जना र बाँकी पर्यटक सार्कबाहिरबाट आएका एमक्यापका सूचना अधिकारी भुवन ओझाले जानकारी दिए ।
विदेशी पर्यटकहरूबाट एमक्यापले यो साउन, भदौ, असोज र कात्तिक महिनामा १ करोड ३८ लाख ९२ हजार १ सय ९१ रुपैयाँ राजस्व आर्जन गरेको छ । गत वर्ष यही समयमा एमक्यापले ९४ लाख ५५ हजार ३ सय ४० रुपैयाँ राजस्व संकलन गरेको थियो ।
यो साउन महिनामा जम्मा ३८ पर्यटक आएका थिए । गत वर्षको साउनमा ८० जना आएका थिए । त्यस्तै गत वर्षको भदौमा ५ सय ४७ जना आएकामा यो भदौमा ६ सय जना, गत वर्षको असोजमा २ हजार ६ सय ५४ जना आएकामा यस असोजमा २ हजार ४ सय ४० र गत कात्तिकमा २ हजार ४ सय ११ जना आएकामा यो कात्तिक महिनामा झन्डै एक हजारले बढी ३ हजार ३ सय ५१ जना विदेशी पर्यटक यस क्षेत्रमा आएका छन् ।
यस वर्षदेखि विदेशी र स्वदेशी पर्यटकसँग मनास्लु क्षेत्रमा अवस्थित चुमनुब्री गाउँपालिकाले पनि राजस्व संकलन गरेको छ । गत असोज १ गतेबाट राजस्व संकलन गर्न सुरु गरेको पालिकाले असोज र कात्तिक दुई महिनामा मात्र ५६ लाख रुपैयाँ राजस्व संकलन गरेको जनाएको छ । दुई महिनामा ५५ सय जना विदेशी पर्यटकसँग प्रतिव्यक्ति एक हजारका दरले ५५ लाख र ४ सय ७९ जना नेपाली पर्यटकसँग जनही दुई सय रुपैयाँका दरले ९५ हजार ८ सय रुपैयाँ संकलन गरेको त्यहाँका कर्मचारी विशाल घलेले जानकारी दिए ।
प्रतिक्रिया दिनुहोस !
