गोरखा : गोरखाको बारपाकमा एक घर आगालागीमा परेर नष्ट भएको छ। गएराति साढे ८ बजे भएको आगलागीमा परी बारपाक सुलिकोट गाउँपालिका २ का ओमबहादुर घलेको घर जलेर नष्ट भएको स्थानीय पुरबहादुर गुरुङले जानकारी दिए।
आगलागीमा परी घरमा रहेका लुगा कपडा, अन्नपात, भाँडाकुँडा र नगद ७० हजार जलेर नष्ट भएको ओमबहादुर घलेले जानकारी दिए। ‘जाडोको बेला बस्ने घर पनि छैन। लगाउने लुगा कपडा पनि बाँकी छैन। ओढ्ने ओछ्याउने पनि छैन,’ घलेले भने, ‘खाने कुरा पनि केही छैन।’
स्थानीय प्रहरीचौकीबाट खटिएका प्रहरी र स्थानीयबासीको पहलमा साढे ९ बजेतिर आगो नियन्त्रणमा आए पनि घर भने पूरै जलेर नष्ट भएको प्रहरीले जनाएको छ। पीडितलाई यथाशिघ्र सहयोग गर्न स्थानीयबासी, स्थानीय सरकार, विपद् व्यवस्थापन समिति, रेडक्रसलाई स्थानीय पुरबहादुर गुरुङको आग्रह छ।
प्रतिक्रिया दिनुहोस !
