अपराधिक क्रियाकलाप गर्नेलाई न एमालेले छोड्छ, न सरकारले : प्रधानमन्त्री ओली

काठमाडौं : नेकपा एमाले अध्यक्ष एवं  प्रधानमन्त्री केपी शर्मा ओलीले कानुन विपरीत क्रियाकलाप गर्ने जोसुकै भएपनि नछोड्ने बताएका छन्। शुक्रबार दरवार मार्गमा आयोजित पार्टीको  जागरण सभालाई  सम्बोधन गर्दै अध्यक्ष ओलीले यस्तो बताएका हुन्। अराजकता ,सामाजिक विद्धेष र विकृतिका विरुद्ध , लोकतन्त्र ,सामाजिक सद्धभाव र राष्ट्रिय एकताका पक्षमा एमालेले जागरण सभा रहेको उनको भनाइ छ।

'कसैले पनि कानुन विपरीत गर्न नहुने अपराधिक क्रियाकलाप गर्छ भने नेकपा एमालेले छोड्दैन। मैले नेतृत्व गरेको सरकारले पनि छोड्दैन। अहिले एमाले र कांग्रेसको मिलिजुली संयुक्त सरकार छ। यसले छोड्दैन,प्रधानमन्त्री ओलीले भने,' यो सरकार देशमा अनुशासन ल्याउनका निम्ति सोचविचार गरेर गठन गरिएको हो।'

सरकारसँग सहकारी ठगीका अनेक प्रमाण रहेको उनको भनाइ छ। उनले सहकारी ठगीमा दोषी देखिएका जोसुकै भएपनि कारवाही हुने बताए। प्रधानमन्त्रीले  भने,'सहकारी ठगीका अनेक प्रमाणहरू छन्। आफै सहकारी ठगी गर्ने अरुलाई मुख छाड्ने।  अरूलाई गाली गर्ने। कुनै पनि भ्रष्टाचार सह्यै हुने छैन। कुनै पनि प्रकारको ठगी सह्यै हुनेछैन। मानव तस्करी सह्यै हुने छैन। कसैलाई पनि नेकपा एमाले र अहिलेको सरकारले जुनसुकै पक्षको जोसुकै जुनसुकै होस् अनुहार हेर्दैन।  अपराध गर्नेलाई कारबाही गर्छ।'

प्रधानमन्त्री ओलीले आफूमाथि भएका दुष्प्रचारहरू निराधार भएको बताए। उनले पछिल्लो समय केही तत्वहरूले भ्रम फैलाएर जनतामा घृणित  फैलाउने दुष्चेष्टा गरिरहेको आरोप लगाए। उनले भने,'आफू बदमासी गर्ने अरुको टाउकोमा खन्याउने। यस्ता भ्रममा कोही पर्छ भन्ने कुरा मलाई विश्वास लाग्दैन।'

उनले इतिहासमा बेइमानी नगरेकाले हरेक क्षेत्रमा  एमालेको जीत अपरिहार्य हुने बताए। 'बलिदान र गौरवपूर्ण इतिहास छ। बलिदान र त्यागको गौरवपूर्ण इतिहास छ। इतिहासमा हामीले बेइमानी गरेका छैनौं। देश र जनताको पक्षमा उभिएका छौं । यसकारण हामी द्विविदा छैन,'उनले भने,'यसकारण नेकपा एमालेको हरेक क्षेत्रमा जीत अपरिहार्य छ। '

प्रधानमन्त्री ओलीले सरकारसँग मुलुकलाई हाक्नका लागि सही नीतिहरू रहेको बताउँदै तिनै नीतिअनुरुप अगाडि बढ्ने बताए।