बेनी : प्रकाश माविले लगातार दोस्रो पटक बेनी नगरपालिका स्तरीय राष्ट्रपति रनिङ शिल्ड खेलकुद प्रतियोगितामा च्याम्पियन भएको छ।
बेनीको खुल्ला मञ्च खेलमैदानमा शनिबार सम्पन्न पाँचौ नगर स्तरीय प्रतियोगितामा न्यु वेष्ट पोइन्ट आवासीय मावि दृतीय र माउन्ट एभरेष्ट आवासीय मावि तृतीय भए। प्रकाश माविले गत वर्षको प्रतियोगिता पनि जितेको थियो।
१३÷ १३ स्वर्ण र रजत तथा एक वटा कास्य पदक सहित प्रकाश मावि लगातार दोस्रो पटक विजेता हुँदा १३ स्वर्ण, छ रजत र १४ कास्य पदक जितेको वेष्ट पोइन्टले उपविजेतामा चित्त बुझायो।
तेस्रो भएको माउन्टले पाँच स्वर्ण, दुई रजत र छ कास्य पदक जितेको छ। तीन दिनसम्म सञ्चालन भएको प्रतियोगितामा २६ वटा विद्यालय सहभागि थिए। एथलेटिक्स, भलिबल, कवड्डी र मार्शल आर्ट विधाका ४० वटा खेलमा प्रतिस्पर्धा भएको थियो।
विजेता विद्यालयले ५१ हजार नगद सहित राष्ट्रपति रनिङ शिल्ड र ट्रफी प्राप्त गरेको छ। दोस्रोलाई ४० हजार र तेस्रोलाई ३० हजार रुपैयाँ नगद सहित ट्रफी प्रदान गरिएको बेनी नगरपालिकाका शिक्षा शाखाका अधिकृत कमलप्रसाद ढकालले जानकारी दिए।
बेनी नगरपालिकाका प्रमुख सुरत केसी, प्रमुख प्रशासकीय अधिकृत अर्जुन शर्मा, शिक्षा शाखाका उपसचिव हेमचन्द्र पौडेलले विजेता विद्यालय तथा खेलाडीहरुलाई प्रमाणपत्र, मेडल र पुरस्कार वितरण गरेका थिए।
प्रतिक्रिया दिनुहोस !
