विराटनगर : मोरङमा हायस गाडीको ठक्करबाट आइतबार दिउँसो साइकल यात्रीको मृत्यु भएको छ । पूर्व–पश्चिम राजमार्गअन्तर्गत सुन्दरहरैँचा नगरपालिका–५ दुलारीमा दुर्घटना भएको हो ।
पश्चिमबाट पूर्वतर्फ जाँदै गरेको बागमती प्रदेश ०८–००१ च ०४७ नम्बरको हायसले दक्षिणबाट उत्तरतर्फ सडक पार गर्दै गरेको साइकललाई दिउँसो ३ बजेतिर ठक्कर दिएको प्रहरीले जनाएको छ । दुर्घटनामा परेर साइकलयात्री सुन्दरहरैँचा–४ का ४४ वर्षीय चन्द्रकुमार राईको मृत्यु भएको मोरङ प्रहरीका प्रवक्ता डीएसपी वेदप्रकाश जोशीले बताए । उनका अनुसार गम्भीर घाइते भएका उनलाई उपचारका लागि बीपी कोइराला स्वास्थ्य विज्ञान प्रतिष्ठान धरान लगिएको थियो ।
उपचारकै क्रममा ४:३५ बजेतिर चिकित्सकले मृत घोषित गरेको जानकारी जोशीले दिए । प्रहरीले हायस र चालक झापाको भद्रपुर नगरपालिका–८ का २६ वर्षीय विशाल दासलाई नियन्त्रणमा लिएको छ । हायसको तीव्र गति र साइकलयात्रीको असावधानीका कारण दुर्घटना भएको प्रहरीको भनाइ छ ।
प्रतिक्रिया दिनुहोस !
