देउवा अनुपस्थित
चीन भ्रमणबारे पूर्वप्रधानमन्त्री र पूर्वपरराष्ट्रमन्त्रीसँग परामर्शमा प्रधानमन्त्री ओली
मंसिर १०, २०८१ सोमबार १२:६:२२
काठमाडौं : प्रधानमन्त्री केपी शर्मा ओलीले आसन्न चीन भ्रमणबारे पूर्वप्रधानमन्त्री र पूर्वपरराष्ट्रमन्त्रीहरुसँग छलफल गरेका छन्। प्रधानमन्त्री ओलीले प्रधानमन्त्री तथा मन्त्रिपरिषद्को कार्यालय सिंहदरबारमा भ्रमणलाई उपलब्धीमूलक बनाउने तयारीस्वरुप पूर्वप्रधानमन्त्री र पूर्वपरराष्ट्रमन्त्रीहरुसँग छलफल गरिरहेको उनको सचिवालयले जनाएको छ।
बैठकमा पूर्वप्रधानमन्त्रीहरु नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधवकुमार नेपाल, सम्मानीत नेता झलनाथ खनाल, मन्त्रिपरिषद्का पूर्व अध्यक्ष खिलराज रेग्मी, सरकारका वर्तमान मन्त्री, पूर्वउपप्रधानमन्त्री, परराष्ट्रमन्त्रीहरु लगायतका नेताहरु सहभागी छन्।
बैठकमा पूर्वप्रधानमन्त्री एवम् नेपाली कांग्रेसका सभापति शेरबहादुर देउवा र नेपाल समाजवादी पार्टीका अध्यक्ष डा. बाबुराम भट्टराई अनुपस्थित रहेका छन्। भट्टराईले आफू गोरखा जानुपर्ने भएकाले उपस्थित हुन नसक्ने जनाउँदै भनेका थिए, 'हाम्रो कमजोर अर्थतन्त्रलाई कम भन्दा कम समयमा विकसित चरणमा पुर्याउन हामीलाई वैदेशिक व्यापार, पूँजी, प्रविधि, ज्ञान र सद्भाव चाहिन्छ, हामीले चीनको बीआरआईले हामीलाई दिएको जस्तोसुकै सम्भावनाको फाइदा उठाउनै पर्छ।'
ओलीले भ्रमणमा उठाउनुपर्ने एजेण्डाका विषयमा पनि सरोकारवालासँग सुझाव लिनेछन्। चीनको औपचारिक निमन्त्रणामा प्रधानमन्त्री ओली आगामी मंसिर १७ गते चीनको राजधानी बेइजिङ जान लागेका हुन्।
प्रधानमन्त्री ओलीको चीन भ्रमणमा बीआरआई, नेपाल-चीनबीच भएका यस अगाडिका सम्झौता र कार्यान्वयन र चलिरहेका परियोजना, दुई देशबीचको सम्बन्ध लगायतका विषयमा पनि छलफल हुने स्रोतको दाबी छ। सांसदहरुले बीआरआईअन्तर्गत ऋण लिन हुने र नहुने दुई थरी मत राख्दै आएका छन्।
पोखरा अन्तर्राष्ट्रिय विमानस्थलका लागि लिएको चिनियाँ ऋण मिनाहाको प्रस्तावलाई पनि जोड दिने सरकारले तयारी गरेको छ। यस अगाडि गत भदौमा अर्थ मन्त्रालयले चीन अन्तर्राष्ट्रिय विकास सहयोग निकायका उपाध्यक्ष याङ वेइकुनमार्फत पोखरा क्षेत्रीय अन्तर्राष्ट्रिय विमानस्थल निर्माण गर्दा लिइएको ऋणलाई अनुदानमा परिणत गर्न चिनियाँ पक्षलाई आग्रह गरेको थियो।
वेइकुन र नेपालका लागि चिनियाँ राजदूत छन् सोङसहितका चिनियाँ टोलीसँगको भेटमा उपप्रधानमन्त्री एवं अर्थमन्त्री विष्णुप्रसाद पौडेलले चीन नेपालको असल छिमेकी भएको र नेपालको अर्थतन्त्रको अवस्थालाई विशेष ध्यान दिँदै पोखरा क्षेत्रीय अन्तर्राष्ट्रिय विमानस्थल निर्माण गर्दा लिइएको ऋणलाई अनुदानमा बदल्न आग्रह गरेका थिए। उक्त विषय प्रधानमन्त्री ओलीको भ्रमणमा पनि प्रस्ताव रहने स्रोतको दाबी छ।
नेपाल चीनको बहुआयामिक सम्बन्धलाई महत्त्वका साथ अघि बढाउन रणनीतिक साझेदारीको दिशामा अग्रसर हुनुपर्ने सरोकारवालाले बताउँदै आएका छन्।
प्रतिक्रिया दिनुहोस !
