डब्लूएमएसी वेल्स खुला प्रतियोगिता : सञ्जितकुमार राईले जिते स्वर्ण

काठमाडौं : नेपालका सञ्जितकुमार राईले डब्लूएमएसी वेल्स खुला प्रतियोगितामा स्वर्णसहित दुई पदक जितेका छन् । आइतबार राति बेलायतको ईबीबीडब्लू भेल लिजर सेन्टर साउथ वेल्समा भएको प्रतियोगितामा सञ्जितले २ स्पर्धामा एक स्वर्ण र एक रजत जितेका हुन् ।

उनले क्रिएटिभ फम्सको मिक्स ब्ल्याकवेल्ट सफ्ट स्टायलमा स्वर्ण जितेका थिए । उनले २६.७ अंक जोडे । ट्रेडिसनल फम्सको मिक्स ब्ल्याकवेल्टमा रजत जित्ने क्रममा सञ्जितले २६.४ अंक बटुलेका थिए । प्रतियोगितामा चार सय ५० खेलाडीको सहभागिता रहेको थियो । प्रतियोगिताका क्रममा सञ्जितले डब्लूएमएसी वेल्सका अध्यक्ष क्रिस स्पाक्र्ससँग पनि भेट गरेका थिए ।

उनको यो पाँचौं अन्तर्राष्ट्रिय पदक हो । यसअघि उनले सन् २०२२ मा स्लोभेनियामा भएको विश्व मार्सल आर्ट्स गेम्समा एक स्वर्ण र एक कांस्य तथा २०२४ मा अमेरिकाको न्युजर्सीमा भएको ब्याटल अफ ड्रागन मार्सल आर्ट्स च्याम्पियनसिपमा स्वर्ण पदक जितेका थिए । राष्ट्रिय उमा कङफु प्रतियोगिताको दुई फरक संस्करणमा पनि उनले दुई स्वर्ण जितेका छन् ।

उनले भारत, अस्ट्रिया र जर्मनीमा भएको प्रतियोगितामा निर्णायकको भूमिकासमेत निर्वाह गर्नुका साथै विभिन्न घरेलु प्रतियोगितामा मुख्य निर्णायकका रुपमा पनि काम गरेका थिए । सञ्जित नेपाल उमा कङफु संघका नवनिर्वाचित अध्यक्ष पनि हुन् ।