एमाले महासचिवसँग भियतनामको कम्युनिस्ट पार्टीको प्रतिनिधि मण्डलको भेटवार्ता

काठमाडौं : नेकपा (एमाले)का महासचिव शंकर पोखरेलसँग नेपाल भ्रमणमा रहेको भियतनाम कम्युनिस्ट पार्टीका वैकल्पिक केन्द्रीय सदस्य ली है विन नेतृत्वको ६ सदस्यीय प्रतिनिधिमण्डलले भेटवार्ता गरेको छ । 

भेटमा दुई देशका सरकार, कम्युनिस्ट पार्टी र जनताबीचको घनिष्ठ सम्बन्धका बारेमा छलफल भएको छ । भेटमा पोखरेलले प्रधानमन्त्री तथा पार्टीका अध्यक्ष केपी शर्मा ओलीले प्रधानमन्त्रीका रूपमा महत्त्वका साथ भियतनामको भ्रमण गरेबाट दुईदेशबीचको गहिरो सम्बन्धलाई उजागर गर्ने  बताए । महासचिव पोखरेलले भियतनामसँगको सम्बन्धका विभिन्न पाटाहरूको चर्चा गर्दै बुद्ध धर्मले नेपाल र भियतनामलाई सांस्कृतिक रूपमा जोड्ने काम गरेको  बताए  । 

महासचिव पोखरेलले यो सम्बन्धलाई घनिष्ट बनाउन दुईदेशबीच सिधा हवाई सेवा सञ्चालन गर्न पहल हुनुपर्नेमा जोड  दिए । महासचिव पोखरेलले भियतनाममा भएको स्वाधीनता र स्वाभिमानको आन्दोलनबाट नेपालले ठूलो शिक्षा र प्रेरणा लिएको स्मरण गरे । उनले भियतनामको आर्थिक विकासबाट नेपालको विकास र समृद्धि यात्रा अगाडि बढाउन सकारात्मक प्रभाव पर्ने विश्वास व्यक्त गरे ।

सो अवसरमा भियतनाम कम्युनिस्ट पार्टीका वैकल्पिक केन्द्रीय सदस्य लिले नेपालमा कम्युनिस्ट पार्टीले हासिल गरेको सफलताप्रति खुसी प्रकट गर्नुहुँदै आगामी दिनमा अझ बढी सफलताको शुभकामना व्यक्त गरे । उनले  दुई कम्युनिस्ट पार्टीबीचको सम्बन्धलाई सुदृढ बनाउँदै दुवै देश र जनताको आर्थिक समृद्धिका लागि आपसी सहयोग अभिवृद्धि गर्न तयार रहेको बताए ।