विपद् सामग्री हस्तान्तरण गर्दै मु्ख्यमन्त्री कार्कीले भने- जोखिम न्यूनिकरणको पूर्व तयारीमा रहनू
मंसिर १२, २०८१ बुधबार १४:२८:११
काठमाडौं : कोशी प्रदेश सरकारले विपदबाट जनधनको क्षति रोक्न सशस्त्र प्रहरीलाई विपद् प्रतिकार्य सामग्री उपलब्ध गराएको छ । बुधबार विराटनगरमा आयोजित एक कार्यक्रमका बिच सशस्त्र प्रहरीलाई साधन स्रोत सम्पन्न बनाउने रणनीति अनुसार करिब १७ लाख १७ हजार रुपैया बराबरको विपद् प्रतिकार्य सामग्री हस्तान्तरण गरिएको आन्तरिक मामिला तथा कानुन मन्त्रालयले जनाएको छ ।
आगलागी नियन्त्रण सामग्रीमा फायर स्वाटर, रेस्क्यु लाइफ ज्याकेट, हेलमेट, बेड म्याट्रेस, सोलार प्यानललगायत ७ प्रकारका सामग्री रहेका छन् । कोशी प्रदेशका मुख्यमन्त्री हिक्मत कुमार कार्कीले सशस्त्र प्रहरी बल बराह बाहिनीका सशस्त्र प्रहरी नायब महानिरीक्षक शम्भु सुवेदीलाई विपद् प्रतिकार्य सामग्री हस्तान्तरण गरेका हुन् ।
कार्यक्रममा मुख्यमन्त्री कार्कीले विपद्बाट हुने क्षति रोक्न पूर्वतयारी कार्यक्रमलाई अगाडि सार्नुपर्ने बताए । उनले असारमा बाढी पहिरो,पुस, माघमा शितलहर र फागुन चैत्रमा आगलागी नियन्त्रणको प्रयास गर्नुभन्दा त्यस अगाडि नै जोखिम न्यूनिकरणको पूर्व तयारी गर्न निर्देशन दिए।
कोशी प्रदेशको आन्तरिक मामिला तथा कानुन मन्त्रालयले चालू आर्थिक वर्षमा विपद् न्यूनिकरण र नियन्त्रणका लागि विभिन्न सामग्री खरिद गर्न करिब ३ करोड रुपैयाँ विनियोजन गरेको छ ।
प्रतिक्रिया दिनुहोस !
