अन्नपूर्णका मिडियाका कर्मचारीलाई अमेरिकाबाट नि:शुल्क अनलाइन कोर्ष

काठमाडौं : अन्नपूर्ण मिडिया नेटवर्कमा कार्यरत रहेका कर्मचारीहरूले अमेरिकाबाट नि:शुल्क विशेषज्ञ ८ हप्ते अनलाइन कोर्ष गर्न पाउने भएका छन् । अमेरिकाको न्यूयोर्कमा रहेको अमेरिकी कम्पनी डाटा जुपिटरले अन्नपूर्ण मिडिया नेटवर्कमा कार्यरत रहेका कर्मचारीलाई  नि:शुल्क विविध विधामा ८ हप्ते विशेषज्ञ कोर्षहरू दिन लागेको हो ।

शुक्रबार अन्नपूर्ण मिडिया नेटवर्कको हेडक्‍वार्टर तीनकुनेस्थित कर्पोरेट टावरमा भएको एक समारोहबीच अन्नपूर्ण कर्मचारीलाई अमेरिकाबाट नि:शुल्क कोर्ष,अमेरिकाबाटै शैक्षिक प्रमाणपत्र दिने सम्झौता भएको हो । सम्झौतापत्रमा अन्नपूर्ण मिडिया नेटवर्कका महाप्रबन्धक मनोज बस्नेत र अमेरिकी कम्पनी डाटा जुपिटरका सञ्‍चालक/ सीईओ प्रो.डा.राजन थपलियाले हस्ताक्षर गरे । थपलिया अमेरिकाको पेश युर्निभरसिटी, नेशनल युर्निभरसिटी, युर्निभरसिटी अफ एरिजोना, द सिटी युर्निभरसिटी अफ न्यूयोर्कमा प्रोफेसरका रुपमा डाटा साइन्स, कम्प्यूटर साइन्स र एआई पढाउँछन् ।

कोर्षका लागि अन्नपूर्णले कर्मचारीको नाम सिफारिस गर्नेछ । सिफारिस गरिएका कर्मचारीलाई जुपिटरले उनीहरूले रोजेको विषयमा ८ हप्ते नि:शुल्क अनलाइन कोर्षसहित शैक्षिक प्रमाणपत्र प्रदान गर्नेछ । ‘अन्नपूर्ण मिडियासँग सहकार्य गर्न पाउँदा हामी उत्साहित छौं,'अमेरिकी कम्पनी डाटा जुपिटरका सञ्‍चालक/सिईओ प्रो.डा.थपलियाले भने, ‘हामीले दिने हरेक कोर्षहरू अमेरिकामा कार्यरत रहेका विषय विशेषज्ञ प्रोफेसरहरूले पढाउनु हुनेछ ।’

जुपिटरले कम्प्युटर साइन्स,डाटा साइन्स,साइबर सेक्युरिटी,एआई,बिजनेश स्टडीज,अर्गनाईजेसन्स,सेल्स तथा मार्केटिङ,एआई पत्रकारितालगायतका कोर्षहरू नि:शुल्क पढाउनेछ।

कम्पनीमा कार्यरत रहेका कर्मचारीहरूको क्षमता वृद्धि र अन्तर्राष्ट्रियस्तरको ज्ञानसहित प्रमाणपत्र हाँसिल गर्न यो सहकार्यले अतुलनीय भूमिका खेल्ने नेटवर्कका महाप्रबन्धक बस्नेत बताउँछन् । ‘यो सम्झौता एक महत्वपूर्ण उपलब्धी हो, 'उनले भने, ‘यसबाट हाम्रा कर्मचारीहरुले अन्तर्राष्ट्रियस्तरको ज्ञानसीप क्षमता पाउनेछन् ।’