बझाङमा शान्तिपूर्ण मतदान जारी : ६६३ मत खस्यो

बझाङ : सुर्मा गाउँपालिका-४ मा वडाध्यक्ष पदका लागि बिहान ७ बजेदेखि उपनिर्वाचन जारी छ। बिहान ११: १५ बजेसम्म ६६३ मत खसिसकेको छ। यहाँ कूल १५५४ मतदाता रहेका छन्। जसमा ११०० सय मत खस्ने अनुमान गरिएको छ।

 मतदान अहिलेसम्म शान्तिपूर्ण वातावरणमा भइरहेको निर्वाचन कार्यालय बझाङले जनाएको छ । वडा अध्यक्ष पदमा नेपाली कांग्रेसबाट धिरेन्द्र  पुजारा,नेकपा एमालेबाट लखिचन्द्र बोहरा र माओवादी केन्द्रबाट पुष्कर बोहराको उम्मेदवार परेको निर्वाचन कार्यालयले जनाएको छ ।

आजै राति २ बजेभित्र नतिजा आउन सक्ने मुख्य निर्वाचन अधिकृतको कार्यालयले जानकारी दिएको छ । गत निर्वाचनमा विजयी एमालेका सर्जन बोहराको मृत्यु भएपछि रिक्त सो पदमा उपनिर्वाचन हुन लागेको हो ।

अघिल्लो निर्वाचनमा एमालेका उम्मेदवारले ६ सय २९ मत ल्याएर विजयी भएका थिए भने निकटतम प्रतिस्पर्धी कांग्रेसका उम्मेदवारले ६ सय ४ मत ल्याएका थिए ।

मतदान सफल बनाउन ९७ जना शशस्त्र प्रहरी र ८६ जना जनपथ प्रहरी गरी १८३ जना सुरक्षाकर्मी खटिएका छन्।  उपनिर्वाचनको बाहिरी सुरक्षामा नेपाली सेनाले गस्ती गरिरहेको प्रमुख जिल्ला अधिकारी ओम प्रसाद भट्टराईले बताए ।