उपनिर्वाचन
पुथाउत्तरगंगाको उपाध्यक्षमा माओवादी केन्द्रकी नरपूरा बुढा विजयी
मंसिर १७, २०८१ सोमबार १५:३६:४२
रुकुम पूर्व : रुकुम पूर्वको पुथाउत्तरगंगा गाउँपालिकामा नेकपा माओवादी केन्द्र विजयी भएको छ । उपप्रमुखका लागि आइतबार भएको उपनिर्वाचन माओवादीकी नरपूरा बुढा पुनले ३ हजार ६ सय २७ मत ल्याएर विजयी भएकी हुन्।
उनकी प्रतिस्पर्धी नेपाली कांग्रेसकी केशकुमारी तुलाचनले २ हजार १ सय २८ मत मात्र प्राप्त गरिन्। माओवादीकी बुढाले १ हजार ४ सय ९९ मतान्तरले विजयी भएकी हुन्।
पुथाउत्तरगंगामा कुल ११ हजार १ सय ८० जना मतदाता रहेकामा ५ हजार ९ सय २१ मत मात्र खसेको थियो । सत्तारुढ काँग्रेस–एमालले गठबन्धन गर्दा माओवादीलाई नेकपा एकीकृत समाजवादीले समर्थन गरेको थियो । यहाँ २०७९ मा भएको निर्वाचनमा माओवादी नै विजयी भएको थियो ।
उपाध्यक्ष भूपेन्द्रा बुढाको गत भदौ २८ गते बागलुङमा भएको गाडी दुर्घटनामा मृत्यु भएको थियो । उनीसँगै पुथाउत्तरगंगा गाउँपालिका वडा नम्बर २ का अध्यक्ष जसबहादुर श्रीपालीको पनि मृत्यु भएको थियो । उक्त वडामा यसअघि नै माओवादी केन्द्रका जगत घर्ती निर्विरोध निर्वाचित भइसकेकी छन्।
प्रतिक्रिया दिनुहोस !
