उदयपुर : उदयपुरको बेलका नगरपालिका वडा नं. ९ मा रोकिएको मतगणना पुनः सुरु भएको छ । बदर मतको विषयलाई लिएर रोकिएको मतगणना निर्वाचन आयोगको आदेशपछि सुरु गरिएको हो ।
निर्वाचन अधिकृत मनोज प्रसाद गुप्ताका अनुसार बदर मतलाई पुनः गणना गर्ने गरी आदेश आएपछि साँझदेखि मतगणना सुरु भएको हो । ५ सय मतगणना गर्दा २२० मत बदर भएपछि दलहरुबीटच विवाद उत्पन्न हुँदा मत गणना रोकिएको थियो ।
निर्वाचन आयोगले कानुन अनुसार अगाडि बढ्न निर्देशन दिएपछि पुनः गणना शुरु गरिएको छ । स्थानीय तह निर्वाचन नियमावली २०७३ र स्थानीय तह उपनिर्वाचन निर्देशिका २०८१ समेतमा भएको मतगणना सम्बन्धी कानुनी व्यवस्था अनुसार त्यस्तो मतपत्रलाई दोहोर्याई मतगणना गर्न सक्ने अधिकार निर्वाचन अधिकृतलाई तोकिएको हुन्छ । निर्वाचन आयोग सोही आधारमा मतगणना गर्न निर्देशन दिइएको आयोगकी प्रवक्ता निता पोखरेलले जानकारी दिइन् ।
तीन हजार १६७ मतदाता रहेको यस वडामा एक हजार ८८५ मत खसेको थियो । यस वडाको वडाध्यक्षका लागि ७ जना प्रतिस्पर्धामा छन् । जसमा नेकपा एमालेका मोहन खड्का, नेपाली कांग्रेसका नवराज बस्नेत, नेकपा माओवादी केन्द्रका भरत घिमिरे, राष्ट्रिय स्वतन्त्र पार्टीका तेजमान विक, राप्रपाका टिकाप्रसाद फुयाँल, जनता समाजवादी पार्टीका राजकुमार राई र मंगोल नेशनल अर्गनाईजेसन पार्टीका सुरे तामाङ्गको उम्मेदवारी रहेका छन् । वडामा नेपाली कांग्रेसबाट निर्वाचित वडाध्यक्ष पदम खड्काको मोटरसाइकल दुर्घटनामा परेर निधन भएपछि उपनिर्वाचन भएको हो ।
प्रतिक्रिया दिनुहोस !
