विराटनगर : नेपाली कांग्रेसको कोशी प्रदेशको पहिलो सम्मेलन आज (शनिबार) प्रदेश राजधानी विराटनगरमा हुँदैछ ।
गृहनगर विराटनगरमा पहिलोपटक हुन लागेको सम्मेलनमा इतर पक्षका नेता डाक्टर शेखर कोइरालाले बहिष्कार गर्ने भएका छन् । आसनग्रहणका लागि दोस्रो वरीयता नपाउने भएपछि सम्मेलनमा कोइराला सहभागी नहुने भएका हुन् । विराटनगरको कार्यक्रम छाडेर उनी चितवनतर्फ लागेका छन् ।
प्रदेश सम्मेलनको उद्घाटन प्रधानमन्त्री एवं पार्टी सभापति शेरबहादुर देउवाले उद्घाटन गर्ने छन् । सम्मेलनका लागि देउवासहितका केन्द्रीय नेताहरु विराटनगर आइपुगेका छन् । डाक्टर कोइरालाका निजीसचिव दिनेशचन्द्र थपलियाका अनुसार शनिबार कोइराला चितवनमा आयोजित दुईवटा शोकसभामा सहभागी हुनेछन् ।
गृहनगर विराटनगरमा हुने प्रदेश सम्मेलनमा सभापतिपछिको ‘पोर्टफोलियो’मा आफूलाई आशनग्रहण गराउनुपर्ने प्रस्ताव कोइरालाको थियो । तर, प्रदेश समितिले केन्द्रीय समितिको ‘रोलक्रम’ अनुसार आसनग्रहण गराउने भनेपछि कोइरालाले बहिस्कार गरेका हुन् ।
पार्टी सभापति शेरबहादुर देउवापछिको वरीयतामा उपसभापति पूर्णबहादुर खड्का छन् । १४ औं महाधिवेशनमा सभापतिमा पराजित कोइरालाले खड्काभन्दा माथि आफ्नो वरीयता हुनुपर्ने बताउँदै आएका छन् ।
सम्मेलनमा उपस्थितिका लागि कोइरालासहितका केन्द्रीय नेताहरुलाई निम्तो गरिएको नेपाली कांग्रेस कोशी प्रदेश महामन्त्री भूपेन्द्र राईले बताए । ‘प्रदेश सम्मेलनमा सबै नेतालाई बोलाएका छौं । को आउने, को नआउनेभन्ने कुरा कार्यक्रम सुरु भएपछि मात्रै थाहा हुन्छ,’ उनले भने, ‘पार्टीको केन्द्रीय समितिले ‘पोर्टफोलियो’ व्यवस्थापन गरेको छ । त्यसलाई प्रदेश समितिले स्वीकार गर्ने हो ।’
कोइरालाले प्रदेश सम्मेलनअघि मंसिर १८ गते विराटनगरमा प्रदेशस्तरीय पालिका सभापतिको सम्मेलन नाम दिएर ‘गुट भेला’को आयोजना गरेका थिए । सम्मेलन १९ गते बेलबारीमा सम्पन्न भयो । यो भेला रोक्नका लागि संस्थापन पक्षले प्रयास गरेपनि सकेन । केन्द्रको सर्कुलरतविपरीत कोइराला पक्षले भेला गरेको हो ।
कांग्रेसको कोशी प्रदेश समितिमा संस्थापन पक्षको बहुमत छ । संस्थापन पक्षले उपसभापति पूर्णबहादुर खड्कालाई पनि बोलाएको छ । उनी विराटनगर आइसकेका छन् । डाक्टर कोइराला पक्षका सभापति भएको लुम्बिनी प्रदेशको सम्मेलनमा भने उनी दोस्रो वरीयतामा थिए । २०८० मंसिर १६ र १७ गते भएको उक्त सम्मेलनमा उपसभापति पूर्णबहादुर खड्का उपस्थित थिएनन् ।
प्रतिक्रिया दिनुहोस !
