नुवाकोट : नुवाकोटको पश्चिमी ग्रामीण भेग नुचेतमा आमासहित दुई नाबालक छोराहरू एकै स्थानमा मृत अवस्थामा फेला परेका छन् । प्रहरीले अनुसन्धान सुरु गरेको छ ।
किस्पाङ गाउँपालिका १ नुचेत, भाल्चेमा आइतवार रेशबहादुर घलेको घरभित्र कोठामा उनकी पत्नी र दुई छोराहरू झुण्डिएको अवस्थामा मृत अवस्थामा फेला परेका छन् ।
घरभित्र कोठामा आमा २४ वर्षीया चन्दीमाया तामाङ, ६ वर्षीय छोरा रोशन घले र अर्का छोरा ३ वर्षीय रोमन घले झुण्डिएको अवस्थामा फेला परेका जिल्ला प्रहरी कार्यालय नुवाकोटले जनाएको छ । प्रहरीले घटनाको अनुसन्धान सुरु गरेको नुवाकोट प्रहरी प्रमुख प्रहरी उपरीक्षक शान्तिराज कोइरालाले जानकारी दिए ।
घटनाको जानकारी पाउने बित्तिकै जिल्ला प्रहरी कार्यालय विदुर नुवाकोटवाट प्रहरी नायव उपरीक्षक तीलक भारतीको एउटा टोली र फिकुरी प्रहरीचौकीबाट प्रहरी अधिकृतको छुट्टै टोली घटनास्थल पुगेको छ । स्थानीयवासीले प्रहरीलाई दिएको जानकारी अनुसार शनिवार मृतक महिला र पति रेशवहादुर घलेबीच घरायसी विवाद भएको थियो ।
गाउँमा बिहानको समयमा पति रेशबहादुर बारीमा केराउ टिप्न गएको समयमा घटना घटेको स्थानीयवासीले बताए । स्थानीयवासीका अनुसार मृतक महिलाले जेठानी प्रेममायालाई छुट्टै कोठाभित्र चुक्कुल लगाएर गएकी थिइन्।
अघिल्लो दिन मृतक र पतिबीच घरायसी विवाद हुँदा पति रेशवहादुरले पत्निलाई दुई थप्पड पनि हानेको सोधपुछबाट जानकारी आएको डिएसपि तीलक भारतीले बताए । घटनास्थलमा सर्वसाधारण, आफन्तको ठूलो भीड लागेको छ ।
मृतक महिलाले कोठाभित्र आफू मर्न लागेको आफन्तलाई टेलिफोन गरेर भनेको र त्यसपछि आफन्तहरू दौडादौड गरेर उनको घर पुग्दा घटना घटिसकेको जानकारी आएको स्थानीय शिक्षक रवीन्द्रनाथ न्यौपानेले जानकारी दिए ।
प्रतिक्रिया दिनुहोस !
