रुकुमपूर्व : रुकुमपूर्वमा अटो रिक्सा दुर्घटना हुँदा एक जनाको मृत्यु भएको छ। सिस्ने गाउँपालिका-६ स्थित पाखा गाउँमा गएराती पौने ११ बजे रुकुमकोटतर्फ आउँदै गरेको अटो रिक्सा दुर्घटना भएको हो ।
लु प ०२००१ ह ०३५० नम्बरको अटो दुर्घटना हुदाँ सिस्ने गाउँपालिका वडा नम्बर ६ की १२ वर्षीया विष्णु बुढाको जिल्ला अस्पताल रुकुमपूर्वमा उपचार गर्ने क्रममा मृत्युको भएको जिल्ला प्रहरी कार्यालय रुकुमपूर्वले जनाएको छ ।
जिल्ला प्रहरी कार्यालय रुकुमपूर्वका सूचना अधिकारी हिम बहादुर के.सीका अनुसार अटो दुर्घटनामा एकको मृत्यु र चालकसहित ४ घाइते भएका छन्। घाइते हुनेमा एउटै घरको १४ वर्षकी शुसिला बुढा, ११ वर्षकी सुस्मिता बुढा, ६ वर्षका महेन्द्र बुढा र सिस्ने गाउँपालिका वडा नम्बर ५ का अटो चालक टोप बहादुर कार्की घाइते भएका छन् ।
घाइते सबैलाई हिजो राति नै उद्धार गरिएको र एकजनाको अवस्था गम्भीर रहेकोले कोहलपुर पठाएको बताइएको छ । अन्य तीन जना घाइतेको जिल्ला अस्पतालमा उपचार भइरहेको प्रहरीले जनाएको छ । प्रहरीका अनुसार अटो तीव्र गतिमा रहेको र अनियन्त्रित हुँदा दुर्घटना भएको हुनसक्ने प्रारम्भिक अनुमान बाटो खुलेको छ भने प्रहरीले थप अनुसन्धान गरिरहेको बताएको छ ।
प्रतिक्रिया दिनुहोस !
