गुलरिया : बर्दियाको गुलरिया नगरपालिका-६ स्थित बर्दिया अस्पताल नजिकै रोकी राखेको ट्याक्टरमा स्कुटर ठोकिँदा बाबु छोरीको मृत्यु भएको छ।
दुर्घटनामा परी स्कुटर चालक सप्तरी जिल्ला रुपनी गाउँपालिका-१ घर भई हाल बर्दियाको गुलरिया नगरपालिका- मा डेरा गरी बस्ने ३७ वर्षीय रामकुमार साह र ६ वर्षीया छोरी विद्या साहको मृत्यु भएको जिल्ला प्रहरी कार्यालय बर्दियाका प्रहरी नायब उपरीक्षक ऋषिराम घर्तीमगरले बताए।
आइतबार अपराह्न राकेश चौधरीले सडक किनारमा रोकी राखेको म १ त १०६२ नम्बरको ट्याक्टरको ट्रलीमा भादापुल तर्फ जाँदै गरेको बा ६८ प ७०३६ नम्बरको स्कुटर ठोकिएको हो।
दुर्घटना लगत्तै बर्दिया अस्पताल पुर्याइएका बाबु छोरीलाई चिकित्सकले मृत घोषणा गरेका हुन्। दुर्घटनामा परी मृतककी श्रीमती ३२ वर्षीया रुवी साहको अवस्था सामान्य रहेको छ।
२ वर्षीय छोरा प्रिन्स साहलाई केही नभएको डीएसपी घर्ती मगरले बताए। घाइतेको बर्दिया अस्पताल गुलरियामा उपचार भइरहेको छ। प्रहरीले स्कुटर, ट्याक्टर र ट्याक्टर चालकलाई नियन्त्रणमा लिई अनुसन्धान भइरहेको जनाएको छ।
प्रतिक्रिया दिनुहोस !
