तस्करीको सामान समात्ने सशस्त्र प्रहरीलाई कारबाहीका लागि तानेपछि...

झापा : तस्करीको सामान मिलेमतोमा छाड्नेलाई विभागीय कारबाही गर्ने सशस्त्र प्रहरी संगठनले सामान समात्ने सशस्त्र प्रहरीलाई कारबाहीको लागि तानेको घटना बाहिर आएको छ । घटना हो,सशस्त्र प्रहरी बल नेपाल,प्रस्तावित सुरक्षा गुल्म भद्रपुरको ।
 
गुल्ममा खटिएका सशस्त्रका वरिष्ठ हवल्दार बलबहादुर श्रेष्ठ र  सशस्त्र जवान आनन्द मण्डलले तस्करीको सामान समातेकै आरोप लगाएर बुधबार बिहान १० बजे सशस्त्र प्रहरी बल नेपाल, नम्बर २ गण हेडक्वार्टर झापा तानिएको हो । 

घटना विवरण अनुसार सशस्त्रका वरिष्ठ हवल्दार श्रेष्ठ र सशस्त्र जवान मण्डलले सोमबार बिहान करिब ९ बजेतिर ९९ नम्बर सीमा पिलर नजिकैबाट दुई बोरा मोबाइलका पार्टस बरामद गरेका थिए । गुल्मबाट गस्तीमा खटाइएका उनीहरूले भद्रपुर–५ स्थित दोभान नाकाबाट मोबाइल पार्टस बरामद गरेपछि तत्काल सशस्त्र प्रहरी बल नेपाल, प्रस्तावित सुरक्षा गुल्म भद्रपुरमा रहेका इन्स्पेक्टर चेतन बाह्रकोटीलाई जानकारी गराए । 

सो सामान थियो, वारिपारि काम गर्ने लाइनमेन बौवा भन्ने राजु कामतीको । समातेको सामान छाडि दिन भन्दै बौवाले घटनास्थलमै वरिष्ठ हवल्दार श्रेष्ठ र जवान मण्डललाई आर्थिक प्रलोभन देखाउन खोजे । उनीहरूले नमानेपछि बौवाले त्यसपछि सबैतिर फोन घुमाउन थाले । त्यसपछि इन्स्पेक्टर बाह्रकोटी आफै सामान हेर्न घटनास्थल पुगे । इन्स्पेक्टर बाह्रकोटीले सामान हेरिसकेपछि एक पटकलाई हो भन्दै सामान छाडिदिन भने । इन्स्पेक्टरको आदेश मानेर उनीहरूले सामान त्यही छाडेर खाली हात फर्किएको सशस्त्र स्रोतले बतायो । 

सामान छुटेपछि बौवाले वरिष्ठ हवल्दार श्रेष्ठ र जवान मण्डललाई भेट्न देवीबस्तीको सूर्यनारायण मन्दिर अगाडि पुगे । ‘बौवाले उनीहरूलाई खाजा खानु भन्दै पैसा दिन खोजे,’सशस्त्र स्रोतले भन्यो,‘उनीहरूले पैसा लिन मानेनन्, बरु गुल्मभित्र मेसका लागि मासु किनेर ल्याइदिनु सबैले खान्छन् भनेर तर्किन खोजे ।’ 

बौवाले मासु आफै किन्नु खानु भन्दै जबरजस्ती ३ हजार ५०० रुपैयाँ दिएर गएको र उनीहरूले गुल्म अगाडिको मासु पसलेलाई ३ हजार ५०० रुपैयाँ पूरै बुझाएर मासु पठाइदिनु भनी आफ्नो कामतर्फ लागेको स्रोतको भनाई छ । 

घटना भएपछि बौवासहितको तस्कर समूहले वरिष्ठ हवल्दार श्रेष्ठ र जवान मण्डललाई भद्रपुरबाट खेदाउनुपर्छ र उनीहरू यहाँ हुँदा दोभानबाट तस्करी हुँदैन भनी योजना बनाए । बौवासहितको समूहले वरिष्ठ हवल्दार श्रेष्ठ र जवान मण्डलले १२ हजार लिएको आरोप लगाएको कुरा माथिसम्म पुर्‍याए । त्यसपछि दुवै जनालाई गणमा तानियो र तस्कर समूहको योजना सफल भयो । 

दोभानबाट लाइनमेनको काम गर्नेहरू दीपेश, राहुल, बौवालगायतको समूहले केही दिनअघि तस्करीको माध्यमबाट भित्राएको ६ पोका कपडा सोही नाकाबाट सशस्त्रले बरामद गरेको थियो । ती कपडा पनि सशस्त्र जवान मण्डल र हवल्दार दीपक केसीले बरामद गरेको थियो । त्यही भएर जवान मण्डल उनीहरूको निशानामा परेको स्रोतको दाबी छ ।

यता सशस्त्र प्रहरी बल नेपाल,प्रस्तावित सुरक्षा गुल्म भद्रपुरमा रहेका इन्स्पेक्टर बाह्रकोटीले दोभानमा फेला परेको दुइटा बोरामा मोबाइलको पुराना पार्टपुर्जा रहेको र त्यो भारत लगिरहेकोले कवाडीको सामान भनी एक पटकलाई छाडिदिएको बताए । ‘वरिष्ठ हवल्दार श्रेष्ठ र जवान मण्डललाई गुल्मबाट गण अन्य कारणले पठाएको र सो घटनासँग जोडिएर होइन,’इन्स्पेक्टर बाह्रकोटीले भने । इन्स्पेक्टरले छाडेको मोबाइल पार्टसहरु त्यही नाकाबाट भित्राइएको र बिग्रेको सामान पुनः फिर्ता पठाउन खोजिएको थियो ।  

त्यस्तै सशस्त्र प्रहरी बल नेपाल,नम्बर २ गण हेडक्वार्टर झापाका डीएसपी तथा प्रवक्ता मदनकुमार रसाइलीका अनुसार वरिष्ठ हवल्दार श्रेष्ठ र जवान मण्डललाई सोधपुछका लागि गुल्मबाट गण बोलाएको बताए । त्यस घटनाको बारेमा पनि उनीहरूसँग सोधपुछ भइरहेको डीएसपी रसाइलीको भनाइ छ ।