रोल्पा : रोल्पामा अलगअलग स्थानमा दुईजनाको हत्या भएको छ । उत्तरी भेग उवा र गाममा हत्याको घटना भएको हो । थबाङ गाँउपालिका-५ हार्जुवास्थित सुमित होटलमा खाना खाएर सुतेका ३७ वर्षीय रमेश रोका क्षेत्रीको घाँटी रेटिएर हत्या भएको अवस्थामा फेला परेका हुन् ।
पुस ३ गते राति सुतेका लु १ ज १८४७ गाडी चालक सुनछहरी गाउँपालिका -५ गाडावाङका रोकाक्षेत्री बिहान अबेर सम्म पनि नउठेपछि उठाउन खोज्दा ओछ्यानमा अचेत अवस्थामा फेला परेको प्रहरीले जनाएको छ । पुस ४ गते बिहान ९:५० बजे होटल साहुले फोनमार्फत प्रहरीलाई जानकारी गराएपछि प्रहरी सहाय निरिक्षक देबेन्द्र विक्रम विकको नेतृत्वमा चारजनाको प्रहरी टोली घटनास्थलतर्फ खटिएको जिल्ला प्रहरी कार्यालयका प्रवक्ता रोहितकुमार शाहीले जानकारी दिए ।
सुनछहरी गाउँपालिका-२ जाजाधाराका ३६ वर्षीय नन्द सिंह परियारलाई उनका छोरा १८ वर्षीय समिर परियारले चिरपटले टाउकोमा हानी हत्या गरेको खुलेको छ । घरायसी विवादका कारण दाउराको चिरपटले टाउकोमा हानी घाइते बनाएपछि पुस ४ गते बिहान ३:३० बजे आफ्नै घरमा मृत्यु भएको प्रहरीले जनाएको छ ।
हत्या आरोपी समिर परियाररलाई प्रहरीले नियन्त्रणमा लिइसकेको छ । दुबैको शव पोष्टमार्टमका लागि अस्पताल ल्याइएको छ । रोकाक्षेत्रीका परिवारले प्रभावकारी अनुसन्धानको माग गरेका छन् ।
प्रतिक्रिया दिनुहोस !
