अछाम : अछामको कमलबजार विमानस्थलमा शनिबार परीक्षण उडान भएको छ। नेपालगन्जबाट तारा एयरको ९एन–एईभी विमान कमलबजार विमानस्थलमा दिउँसो ३ बजे अवतरण भएको थियो। उडानको नेतृत्व क्याप्टेन टीएस नगरकोटीले गरेका थिए। ११ बजे नै नेपालगन्जबाट परीक्षण उडान गर्ने भनिएकोमा खराब मौसमका कारण ढिलो भएको थियो।
शनिबारै संस्कृति, पर्यटन तथा नागरिक उड्डयन मन्त्री बद्री पाण्डेले विमानस्थलको औपचारिक उद्घाटन गर्ने कार्यक्रम तय थियो। परीक्षण उडान गरेर फर्के जहाज खराब मौसमका कारण मन्त्री मन्त्री पाण्डेलाई लिएर आउन सकेन। कमलबजार नगरपालिकाका मेयर यज्ञप्रसाद ढकालले खराब मौसमका कारण उद्घाटन कार्यक्रम स्थगित गरिएको र १५/२० दिन भित्र विमानस्थलको उद्घाटन कार्यक्रम फेरि तय गरिने बताए।
विमानस्थल उडान परीक्षणका क्रममा स्थानीयहरू निकै खुशी र हौसिएका मेयर ढकालले बताए। उनले यस क्षेत्रका ५ पालिका मंगलसेन नगरपालिका, कमलबजार, पञ्चदेवल विनायक, ढकारी गाउँपालिका र तुर्माखाँद गाउँपालिकासँग समन्वय गरेर नियमित उडानका लागि बजेटको व्यवस्था गर्ने बताए। उनले भने, ‘अब उडान नियमित सञ्चालन गर्ने छौं। सुरुमा एकपटक कमलबजारबाट नेपालगन्जका लागि उडान गर्ने गरी पहलमा छौं। कमलबजारबाट जहाज चढ्ने र सहजै रुपमा गन्तव्य पुग्ने यहाँका स्थानीयहरू सपना अब पूरा हुनेछ।’
मेयर ढकालले विमानस्थलमा पहिलो पटक नभएर दोस्रो पटक उडान परीक्षण गरिएको बताए। ढकालले २०६५ सालमा पनि पहिलो पटक उडान परीक्षण गरिएको बताए। उनले भने, ‘२०४९ मा विमानस्थलको निर्माण कार्य सुरु भयो। २०५९ तिर द्वन्द्वकालमा माओवादीले विमानस्थलमा बनेका टर्मिनल भवन, बन्दै गरेको रिपिटर टावर ध्वस्त बनाए। त्यसपछि गौचरण जस्तै बनेको विमानस्थलमा २०६५ मा उडान परीक्षण भयो। त्यति बेला पर्यटन मन्त्री लोकेन्द्रबहादुर विष्ट मगर थिए। दोस्रो पटक आज उडान परीक्षण सफल भएको छ। मौसम खराबीका कारण भने केही समस्या भयो।’
परीक्षण उडानका लागि आर्थिक वर्ष २०८०/०८१ मा विमानस्थलको स्तरोन्नतिका लागि संघ सरकारबाट प्राप्त एक करोड ३५ लाखमा विमानस्थल ग्राभेल गरिएको मेयर ढकालले बताए।
विमानस्थल सञ्चालनमा नआउँदा गौचरनमा परिणत भएको थियो। कमलबजार विमानस्थल निर्माणमा हालसम्म ३ करोड ८५ लाख भन्दा बढी खर्च भइसकेको छ। सुदूरपश्चिम प्रदेशको दुईवटा विमानस्थल रहेको एक मात्र पहाडी जिल्ला अछाम हो। अछामको मुख्य व्यापारिक केन्द्र साँफेबगर र कमलबजारमा गरी दुई स्थानमा विमानस्थल छन्। साँफेबगर विमानस्थलमा समिट एयरले हप्तामा दुई दिन सोमबार धनगढी-साँफे-नेपालगंज र बिहीबार धनगढी-साँफे-धनगढी उडान भर्दै आइरहेको छ। हप्तामा दुई पटक सञ्चालन हुने उडान समेत नियमित हुन सकेको छैन।
प्रतिक्रिया दिनुहोस !
