दक्षिण कोरियामा १८१ जना सवार विमान दुर्घटनामा : ४७ जनाको मृत्यु
२ जनाको जीवितै उद्धार
पुष १४, २०८१ आइतबार ९:१९:२०
दक्षिण कोरियाको मुआन अन्तर्राष्ट्रिय विमानस्थलमा आइतबार एक विमान अवतरणका क्रममा दुर्घटनामा परेको छ । यो विमानमा १८१ जना सवार थिए जसमा १७५ यात्रु र छ जना चालक दलका सदस्य रहेका बीबीसी समाचारमा उल्लेख छ।
दक्षिण कोरियाको दमकल विभागले यस दुर्घटनामा कम्तीमा ४७ जनाको मृत्यु भएको जनाएको छ ।
जेजु एयरको विमान बैंककबाट दक्षिण कोरिया फर्किरहेको जनाइएको छ । विमान अवतरण गर्ने क्रममा यो दुर्घटना भएको हो ।
दमकल विभागका अधिकारीहरूका अनुसार हालसम्म घटनास्थलबाट दुई जना जीवितै फेला परेका र उनीहरूलाई उद्धार गरिएको छ। उद्धार कार्य अझै जारी छ।
विमानको पछाडिको भागबाट यात्रुलाई बचाउने काम भइरहेको विमानस्थल अधिकारीहरुले बताएका छन् । समाचार एजेन्सी योनहापका अनुसार विमानमा सवार १७३ यात्रु दक्षिण कोरियाका र दुई जना थाइल्याण्डका थिए ।
दक्षिण कोरियाको दमकल विभागले जारी गरेको विज्ञप्तिमा एक यात्रु र एक जना चालक दलका सदस्यलाई बचाइएको बताइएको छ । ३२ दमकल र ८० कर्मचारी घटनास्थलमा पठाइएको विभागले जनाएको छ । बीबीसी
प्रतिक्रिया दिनुहोस !
