काठमाडौं : दक्षिण कोरियामा भएको विमान दुर्घटनामा १७९ जनाको मृत्यु भएको पुष्टि भएको छ। दक्षिण कोरियाको समाचार एजेन्सी एनहापका अनुसार १७९ जनाको मृत्यु भएको हो।
दुईजनाको भने जीवितै उद्धार गरिएको थियो। आइतबार बैंककबाट आउँदै गरेको जेजु एयरको विमान दक्षिण कोरियाको मुआन अन्तर्राष्ट्रिय विमानस्थलमा अवतरणका क्रममा धावनमार्गबाट चिप्लिएर दुर्घटना भएको थियो। विमानमा चालक दलका ६ सदस्य र १७५ यात्रु गरी जम्मा १८१ जना सवार थिए। विमानमा सवार यात्रुमध्ये १ सय ७३ दक्षिण कोरियाली र २ जना थाई नागरिक थिए।
विमानस्थलमा अवतरण गर्ने क्रममा विमानको ल्यान्डिङ गियरमा समस्या देखिएको थियो। जसका कारण विमान ल्यान्डिङ गियर बिना नै अवतरण भएको थियो। पर्खालमा ठोक्किएपछि विमानमा आगो लागेको थियो।
दुर्घटना स्थानीय समयअनुसार ९:०७ मा भएको थियो। दुर्घटना भएको जेजु एयरलाइन्सको विमान अमेरिकी कम्पनी बोइङको ७३७–८०० नम्बरको विमान हो। विमानले दुई पटक विमानस्थलमा अवतरण गर्ने प्रयास गरेको थियो। पहिलो प्रयासमा पनि ल्यान्डिङ गियर नखुलेपछि विमान अवतरण हुन सकेको थिएन। त्यसपछि विमानले विमानस्थलको परिक्रमा गरेको थियो।
दोस्रो पटक पाइलटले ल्यान्डिङ गियर बिना नै विमान अवतरण गरेका थिए। कतिपय मिडिया रिपोर्टहरुमा चरा विमानको पखेटामा ठोकिएको दाबी गरिएको छ।
प्रतिक्रिया दिनुहोस !
