एमाले केन्द्रीय कमिटी बैठकको दोस्रो दिन : प्रतिवेदनमाथि केन्द्रीय सदस्यले सुझाव दिनेक्रम जारी
पुष २२, २०८१ सोमबार १२:९:४
काठमाडौं : नेपाल कम्युनिष्ट पार्टी (एमाले)को केन्द्रीय कमिटी बैठक दोस्रो दिन जारी रहेको छ। आइतबार प्रधानमन्त्री एवम् पार्टी अध्यक्ष केपी शर्मा ओली र महासचिव शंकर पोखरेलले पेश गरेको राजनीतिक र सांगठनिक प्रतिवेदनमाथि च्यासलमा आज पनि छलफल जारी रहेको प्रचार विभाग प्रमुख राजेन्द्रले जानकारी दिए।आइतबार बैठकमा २७ जनाले धारणा राखेका थिए।
आइतबार सुदुरपश्चिम,कर्णाली र लुम्बिनी प्रदेशका केही केन्द्रीय सदस्यहरुले आफ्नो धारणा राखेका छन्। आजको बैठकमा लुम्बिनीका बाँकी केन्द्रीय सदस्य, गण्डकी,बागमती, मधेस र कोशी प्रदेशका केन्द्रीय सदस्यहरुले आफ्ना धारणा राख्नेछन्। प्रतिवेदनमाथि छलफल गर्न केन्द्रीय सदस्यहरूलाई समूहगतरुपमा विभाजन नगरी बैठकमा पालैपालो बोल्न दिइएको हो। केन्द्रीय सदस्यले ३ मिनेटभित्र प्रतिवेदन र राजनीतिक विषयमा बुँदागत रुपमा सुझाव र धारणा राख्नेछन्। यसअघि प्रतिवेदनमाथि समूहगत छलफल हुने गरेको थियो। 
केन्द्रीय सदस्यहरुले धारणा राखेपछि महासचिव शंकर पोखरेल र प्रधानन्त्री एवं अध्यक्ष केपी शर्मा ओलीले जवाफ दिने कार्यसूची छ।
बैठक आरम्भ गर्दै प्रधानमन्त्री तथा पार्टी अध्यक्ष ओलीले देश विशेष परिस्थितिबाट गुज्रिरहेको र देशभक्त तथा प्रगतिशील शक्ति मजबुत बन्दै गएकाले प्रतिक्रियावादीहरू आतङ्कित भएर अस्वस्थ र झुठो प्रचारको हमलामा उत्रिरहेको बताएका थिए।
नेकपा (एमाले) र पार्टीका नेताहरूविरूद्ध जनतामा घृणाभाव पैदा गर्ने र जनताबाट अलग्याउने प्रयासमा प्रतिक्रियावादीहरू लागिरहेको बताउँदै ओलीले पार्टीपङ्ती एकताबद्ध भई विरोध र हमलाको सामना गर्नुपर्ने आवश्यकतामा जोड दिएका थिए।
प्रतिक्रिया दिनुहोस !
