सहकारीको रकम हिनामिना : रुकुमपश्चिममा सरकारको समेत करिब दुई करोड डुब्यो

रुकुमपश्चिम : आठबिसकोट नगरपालिका- ९ स्थित आठबिसकोट बचत तथा ऋण सहकारी संस्थाले बचतकर्ता र स्थानीय सरकारबाट लिएको कर्जा फिर्ता गर्न नसकेपछि सहकारीनै बन्द भएको छ ।  

यो सहकारीले बचतकर्ताको करिब पाँच लाख र आठबिसकोट नगरपालिकालाई एक करोड ७२ लाख रुपैयाँ फिर्ता गर्न नसकेपछि बन्दको अवस्थामा पुगेको हो । सहकारीले बचत र कर्जा फिर्ता नगरेको भन्दै नगरपालिकाको न्यायिक समितिमा उजुरी परेपछि नगरपालिकाले छानबिन समिति गठन गरेको छ ।

वडा नम्बर १ का वडा अध्यक्ष देवबहादुर घर्तीको संयोजकत्वमा गठित छानबिन समितिले दैनिक तथा मासिक बचतकर्ता र नगरपालिकाबाट लिएको कर्जा फिर्ता गर्न नसकेको जनाएको छ । छानबिन समितिका संयोजक घर्तीका अनुसार सहकारीले नगरपालिकाबाट लिएको एक करोड ७२ लाख पाँच हजार रुपैयाँ फिर्ता गर्न नसकेको हो ।

शैक्षिक कर्जाका लागि लिएको एक करोड रुपैयाँ, घरेलु तथा साना उद्योगका लागि दिएको ३८ लाख ४० हजार र विपन्न नागरिकको शेयर लगानीको लागि लिएको ३३ लाख ६५ हजार रुपैयाँ फिर्ता गर्न नसकेको समितिको प्रतिवेदनमा उल्लेख छ । 

नगरपालिकाले सहकारीमा ६ सय ७३ जना विपन्न नागरिकको शेयर खरिदका लागि उक्त रकम दिएको थियो । सहकारीले एक व्यक्तिलाई पाँच हजारका दरले ५० कित्ता शेयर दिनेगरी उक्त कर्जा लिएको बुझिएको छ । 

बचत रकम पनि फिर्ता हुने संभावना न्यून

सहकारीमा दैनिक र मासिक रुपमा बचत गरेका बचतकर्ताहरूको रकम समेत डुबेको छ । छानबिन समितिका अनुसार ६९ जना दैनिक बचतकर्ताको एक लाख ७५ हजार १ सय १५ रुपैयाँ र १ सय १० जना मासिक बचतकर्ताको ३ लाख ३ हजार ६१ रुपैयाँ फिर्ता गर्न सकेको छैन ।

आठबिसकोट नगरपालिकाको सहकारी ऐन, २०७४ बमोजिम दर्ता नम्बर ४३ मा २०७४ चैत्र १८ गते यो सहकारी दर्ता भएको थियो । सुरुमा १ सय १ जना मात्र शेयर सदस्य रहेको यस सहकारीमा हाल ९ सय ५६ जना शेयर सदस्य छन्  । 

सहकारी सञ्चालक समितिका सचिव घनश्याम भण्डारीका अनुसार ऋण लिएकाहरूले साँवा तथा व्याज नदिँदा सहकारी बन्द हुने अवस्थामा पुगेको बताए । उनले ५० हजारदेखि माथि ऋण लिएका ३६ जना ऋणीले नियमानुसार रकम फिर्ता नगर्दा यो समस्या आएको बताए । उनका अनुसार ऋण असुलीका लागि पाँचपटक भन्दा बढी नै पत्राचार गरि सार्वजनिक सूचना समेत जारी गरिएको छ भने ऋण नतिर्नेहरूको विवरण जिल्ला प्रहरी कार्यालयमा पनि जानकारी गराइएको छ । अब धितो लिलाम गरेर भएपनि ऋण असुली गरिने उनको भनाइ छ । 

वडा नम्बर- ५ का वडा अध्यक्ष समेत रहेका भण्डारीले १०२ औं नगर कार्यपालिका बैठकमा छानबिन समितिको प्रतिवेदन पेश भएको र असुल उपरका लागि न्यायिक समितिलाई जिम्मा दिइएको बताए ।  उनका अनुसार बचत र कर्जा रकम असुलीका लागि एक महिनााको भाका दिने र सो अवधिमा पनि ऋण तिर्न नसके कानुन बमोजिम कारवाहीसँगै असुलीउपरको प्रक्रिया सुरु गर्ने  निर्णय गरिएको छ ।

देशभर सहकारी ठगी तथा बचत कर्ताको रकम अपचलन भइरहकेको अवस्थामा रुकुममा पनि यो समस्या देखिएको हो।