नयाँ दिल्ली : भारतको आन्ध्र प्रदेशमा बुधबार राति तिरुपति विष्णु निवासम आवासीय परिसरमा भएको भागदौडमा छ जना भक्तजनको मृत्यु भएको छ भने ४० जना घाइते भएका छन्। दर्शनको लागि टोकन लिन बैकुण्ठ द्वारमा ठूलो संख्यामा भक्तजनहरू भेला हुँदा भागदौड मच्चिएको थियो।
मृत्यु हुनेमा ५ महिला र १ पुरुष छन्। घाइतेहरूलाई अस्पताल लगिएको छ।
पवित्र वैकुण्ठ एकादशीको अवसरमा दर्शनको लागि टोकन लिन हजारौं भक्तजनहरू आएका थिए। बिहीबार बिहान ५ बजेदेखि ९ वटा काउन्टरमा टोकन वितरण गर्ने कार्यक्रम थियो। तिरुपति शहरका आठ स्थानमा टिकट वितरण केन्द्रहरू बनाइएका थिए। भक्तजनहरू ठूलो संख्यामा भेला भएका हुनाले एक विद्यालयमा स्थापित केन्द्रमा भीड नियन्त्रण बाहिर गयो र भागदौड मच्चियो।
दुर्घटनापछि ४० जना घाइतेमध्ये २८ जनालाई रुइया अस्पताल र १२ जनालाई सिआइएमएस अस्पतालमा भर्ना गरिएको जनाइएको छ।
आन्ध्र प्रदेशका मुख्यमन्त्री एन. चन्द्रबाबु नायडूले घटनामा मृत्यु भएकाप्रति गहिरो समवेदना व्यक्त गरेका छन्। दुर्घटना लगत्तै, उनले तिरुपति प्रशासन र टीटीडी अधिकारीहरूसँग जानकारी सङ्कलन गर्न र आवश्यक आदेश दिन टेलिफोन सम्मेलन गरेका थिए।
बिहीबार मुख्यमन्त्री आफैं दिउँसो तिरुपति पुगेर स्थितिको अवलोकन गर्ने जनाएका छन्।
वैकुण्ठ एकादशी शुक्रबार (जनवरी १०, २०२५) मनाइनेछ। वैकुण्ठ एकादशी हिन्दू क्यालेन्डरको धनुर महिना (धनु सूर्य महिना) मा पर्छ। तमिल परम्परामा यसलाई धनुरमास वा मार्गझी महिना भनिन्छ।
यो शुक्ल पक्षको एकादशी हो। वैकुण्ठ एकादशी सौर्य पात्रोको आधारमा निर्धारण गरिन्छ । यो हिन्दू चन्द्र पात्रोको मार्गशीर्ष वा पौष महिनामा पर्न सक्छ। यस दिन व्रत बसेर भगवान विष्णुको पूजा गर्नाले वैकुण्ठ धामको ढोका खुल्ने विश्वास गरिन्छ।
प्रतिक्रिया दिनुहोस !
