गुल्मी : गुल्मीको पवित्र धार्मिकस्थल रिडीमा आजदेखि माघी मेला सुरू भएको छ । उद्योग वाणिज्य संघ रिडी शाखा,रुरु फ्रेन्डस क्लब र फ्रेन्डस क्लबको संयुक्त आयोजनामा माघी मेला सुरू भएको हो । तीन जिल्लाको संगमस्थल रिडीस्थित कालीगण्डकी नदीमा बिहानैदेखि नुहाउने र पुजाआराधना गर्ने श्रद्धालुको घुइँचो लागेको रुरक्षेत्र गाउँपालिका–१ का वडाध्यक्ष नवराज विकले जानकारी दिए ।
पहिले जेठी,माइली र कान्छी सङ्क्रान्तिका नाममा विभाजन गरेर तीन दिनसम्म रिडीमा माघी मेला हुने गर्दथ्यो । तर,पछिल्लो समय श्रद्धालुको चाप र स्थानीयको मागका आधारमा बढाएर मेला छ दिन गराइएको छ । चार धाममध्येकै एक धाम रुरुक्षेत्र भएकाले पनि माघे सङ्क्रान्तीमा स्नान गर्न र पूजाआजाका लागि श्रद्धालुको घुइँचो लाग्ने गर्दछ ।
कालिगण्डकी नदी तीन जिल्लाको संगम स्थलमा पर्ने गर्दछ । गण्डकीमा स्नान र मेलाको अवलोकन गर्नका लागि गुल्मी,पाल्पा र स्याङ्जालगायत जिल्लाबाट श्रद्धालु आउने गरेको वडाध्यक्ष विकले बताए । चारधाममध्येको एक प्रमुख धाम मानिने रुरु क्षेत्रको कालीगण्डकीमा माघे सङ्क्रान्तिका दिन स्नान गरेर रुरु कन्याको दर्शन गरेमा मानिसले आफूले अन्जानमा गरेका सम्पूर्ण पापबाट मुक्त भई मोक्ष प्राप्त हुने किंबदन्ती छ ।
विशेषगरी माघे सङ्क्रान्तिका दिनमा कालीगण्डकीमा स्नान गर्नाले देव ऋण,पितृ ऋण तथा रिषि ऋणसमेत मुक्ति पाइने धार्मिक विश्वासका कारण हजारौं मानिस यस अवसरमा रिडि क्षेत्रधाममा आउने गर्छन् । यो मेलालाई यस क्षेत्रकै पर्वको रुपमा हेरिन्छ । प्रत्येक वर्ष लाग्ने यो मेला तीन जिल्लामा फरक फरक कार्यक्रमको आयोजना गर्ने गरिन्छ । पाल्पाजिल्ला तर्फ धार्मिक कार्यक्रम भजन कृतन ,पुजापाठ ,भण्डारा ,दान पुन्य जस्ता कार्यक्रम हुने गर्दछन् । यस्तै गुल्मीतर्फ स्थानीय संघसंस्थाको सहयोग बृहत् सांस्कृतिक कार्यक्रमको आयोजना हुने गर्दछ । छ दिनसम्म चल्ने मेलामा स्याङ्जा तर्फ ठूलो राशीमा खुल्ला भलिबल प्रतियोगिता र विभिन्न परिकारका होटल सञ्चालन हुने गर्दछन् ।
मेलामा पाल्पा,गुल्मी,स्याङ्जा,अर्घाखाँची,रुपन्देही,बाग्लुङ,पर्वत,रुकुम,काठमाडौंलगायतका स्थानबाट समेत भक्तजन भगवानको दर्शनको निम्ति आउने गरेको पाइन्छ । यहाँ रुकुमबाट भेडाका उनबाट बनेका चारपाटे काम्ला,लम्बरी काम्ला जुम्लेली सुइटर,टोपि,उनका सुइटर,राडीपाखी,बिक्री गर्न व्यापारी आउने गर्दछन् । यस्तै मेलामा डाला, सुपा, नाम्ला, चाल्नाहरुको पनि व्यापार हुने गर्दछ । घरेलु उद्योग तथा स्थानीय परिकारबाट ब्यापारीहरुले लाखौको आम्दानी गर्ने गर्दछन् ।
पाहुरको रुपमा पठाइने गुल्मेली गुड,खुदो,कफि,टिमुर,सिन्की,सुन्तला,अचारलगायतका ग्रामीण भेगमा पाइने खानेकुराको विक्री वितरण हुने गर्दछ । गुल्मीतर्फ २ सय र पाल्पामा १ सय गरि मेलामा ३ सय स्टल राखिएको गुल्मी उद्योग वाणिज्य संघ रिडी शाखाका अध्यक्ष तथा मेला मुल आयोजक समिति संयोजक ताराप्रसाद सुवेदीले जानकारी दिए ।
मेलामा अवलोकन गर्न श्रद्धालुलाई प्रवेश निःशुल्क गरिएको छ । उनले स्थानीय कला संस्कृतिको जगेर्ना गर्दै धार्मिक क्षेत्रको थप प्रचारप्रसारका लागि प्रत्येक वर्ष मेलाको आयोजना गर्दै आएको मुल आयोजक समिति संयोजक सुवेदीले बताए । मेला माध्यमबाट यहाँका स्थानीय कला, संस्कृति,कृषि प्रदर्शनी,नेपाली मौलिकताका साथै धार्मिक तथा पर्यटकीय क्षेत्रको प्रचारप्रसार गरेर पर्यटन प्रवर्द्धन सहयोग मिल्ने सुवेदीले बताए ।
६ दिनसम्म चल्ने मेलामा दैनिक राष्ट्रिय स्तरका कलाकारहरू प्रस्तुति रहने छ । मेलामा स्थानीय विभिन्न परम्परागत झाँकीहरू नाच,लाखे नाच,भजन,बाल उद्यान,कृषि तथा घरेलु उत्पादनको प्रर्दशनीलगायत हस्तकलाबाट निर्माण गरिएका वस्तुहरूको प्रर्दशनी गरिने आयोजकले जनाएको छ ।
साथै मेलामा गुल्मीको गुण खुदो,राडीपाखी,पाला सुपालगायतका कोदाको बिस्कुट,विभिन्न परिकारका खाना र खुदोबाट निर्माण गरिएका विभिन्न परिकार मेलाका आर्कषण रहेको बताइएको छ । परापूर्व कालदेखि लाग्ने मेला भएकाले यहाँ पूर्वी रुकुमबाट उनीबाट निर्माण गरिएका कम्मल पनि ब्रिक्रीका लागी ल्याइने गर्दछ । मेलामा पुगेकाहरूलाई रमाइलो र धार्मिक क्षेत्रको प्रचारका लागि यसवर्ष पनि गण्डकीमा र्याफ्टिङ
सञ्चालन गरिएको आयोजकले जनाएको छ ।
प्रतिक्रिया दिनुहोस !
