ट्रम्पको चेतावनी : इरानले गल्ती स्वीकार गरोस्, नत्र परिणाम भोग्न तयार रहोस्
असार २७, २०८३ शनिबार १४:३१:४९
अमेरिका : अमेरिकाले इरानले सार्वजनिक रूपमा होर्मुज जलडमरूमध्य खुला रहेको घोषणा गर्नुपर्ने र शनिबार हुने वार्ता अन्तर्गत व्यावसायिक जहाजमाथिको गोलीबारी रोक्ने प्रतिबद्धता जनाउनु पर्ने माग गरेको छ ।
अमेरिकी सञ्चारमाध्यमहरूले नाम नखुलाइएका अधिकारीहरूलाई उद्धृत गर्दै जनाएअनुसार, इरानले निजी रूपमा राष्ट्रपति डोनाल्ड ट्रम्पका सल्लाहकारहरूसँग जहाजमाथि भएको गोलीबारी गल्ती भएको स्वीकार गरेको छ । यद्यपि, इरानले उक्त घटनाको जिम्मेवारी आफूले नियन्त्रण गर्न नसकेको एउटा आन्तरिक कट्टरपन्थी समूहमाथि लगाएको बताइएको छ । ट्रम्पले होर्मुज जलडमरूमध्यमा यस साता भएको तनावका बाबजुद दुवै पक्ष वार्ता जारी राख्न सहमत भएको बताएका छन् । तर ह्वाइट हाउसले उक्त घटनालाई युद्धविराम उल्लंघनको रूपमा व्याख्या गरेको छ ।
‘इरानले गल्ती स्वीकार गरोस्, नत्र परिणामका लागि तयार रहोस्’
अमेरिकी अधिकारीहरूले क्षेत्रीय मध्यस्थमार्फत इरानी नेतृत्वलाई सन्देश पठाइएको जानकारी दिए । त्यसमा इरानले होर्मुज जलडमरूमध्य खुला रहेको घोषणा गर्नुपर्ने र व्यावसायिक जहाजमाथिको गोलीबारी रोक्ने सार्वजनिक प्रतिबद्धता गर्नुपर्ने माग गरिएको छ ।
शुक्रबार आएन नयाँ आक्रमणको खबर
अमेरिकी उपराष्ट्रपति जेडी भान्स, विदेशमन्त्री मार्को रुबियो, विशेष दूत स्टिभ विटकफ तथा ट्रम्पका ज्वाइँ जेरेड कुशनरसहितका अधिकारीहरूले शनिबार ओमानमा हुने वार्ताको नेतृत्व गर्न सक्ने बताइएको छ । यसैबीच, कतारको एक प्रतिनिधिमण्डल शुक्रबार इरान पुगेको छ । भ्रमणको उद्देश्य तनाव कम गर्नु र होर्मुज जलडमरूमध्य हुँदै जहाजहरूको आवागमन सहज बनाउने विषयमा छलफल गर्नु रहेको बताइएको छ ।
ट्रम्पले शुक्रबार ट्रुथ सोसलमा लेखेका छन्, ‘इरानले हामीसँग वार्ता जारी राख्न अनुरोध गरेको छ ।’ उनले थप लेखेका छन्, ‘हामी त्यसका लागि सहमत भएका छौं, तर अमेरिकाले उनीहरूलाई स्पष्ट रूपमा भनिसकेको छ कि युद्धविराम अब समाप्त भएको छ ।’ यस साताको सुरुतिर खाडी क्षेत्रमा झडप सुरु भएयता शुक्रबार कुनै नयाँ आक्रमणको सूचना आएको छैन । जुनमा भएको अन्तरिम सम्झौतापछि अमेरिका र इरानबीच भएको यो सबैभन्दा गम्भीर सैन्य तनाव मानिएको छ । अमेरिकाले प्रस्ताव गरेको ओमानको समुद्री मार्ग प्रयोग गरिरहेका तीन वटा जहाज निशाना बनेका थिए ।
सम्झौतामा होर्मुजको भविष्यबारे पनि सहमति
गत महिना अमेरिका र इरान १४ बुँदे समझदारीपत्र (एमओयू) मा सहमत भएपछि केही प्रगति भएको थियो। यसको उद्देश्य युद्धविरामको अवधि लम्ब्याउनु र सबै मोर्चामा द्वन्द्व अन्त्य गर्नु रहेको थियो । सम्झौताअनुसार इरान र ओमानले अन्य खाडी मुलुकहरूसँग मिलेर होर्मुज जलडमरूमध्यको भविष्यको प्रशासन र समुद्री सेवाको व्यवस्थापनबारे छलफल गर्नेछन् ।
संघर्षका क्रममा इरानले होर्मुज जलडमरूमध्यमाथि आफ्नो सार्वभौमिक अधिकार स्थापित गर्ने प्रयासस्वरूप ‘पर्सियन गल्फ स्ट्रेट अथोरिटी’ स्थापना गरेको थियो । इरानका अनुसार यस संस्थाले सुरक्षित आवागमनका लागि आवश्यक अनुमति (परमिट) जारी गर्नेछ । इरानको फार्स समाचार एजेन्सीका अनुसार अमेरिका–इरानबीच हुने नयाँ सम्झौताअनुसार भविष्यमा होर्मुज जलडमरूमध्यको व्यवस्थापन इरान र ओमानको संयुक्त समन्वयमा गरिनेछ । सम्झौतामा यस जलमार्ग हुँदै आवागमन गर्ने जहाजहरूबाट सम्भावित सेवा शुल्क उठाउने व्यवस्था पनि समावेश हुन सक्ने उल्लेख गरिएको छ ।
प्रतिक्रिया दिनुहोस !
