काठमाडौं: एसएलसी परीक्षाको ८३ वर्षे इतिहासमा परीक्षा नियन्त्रण कार्यालयले पहिलो पटक सबै विद्यार्थीको परीक्षाको नतिजा ग्रेडिङ (अक्षराङक) प्रणालीमा सार्वजनिक गरेको छ ।
विगतका वर्षहरुमा विद्यार्थीको प्राप्ताङकलाई कुल एक सय पूर्णाङकमा गणना गरेर उत्तीर्ण प्रतिशतको आधारमा नतिजा प्रकाशन गरिँदै आएको थियो ।
विद्यार्थीलाई प्राप्ताङकको आधारमा उत्तीर्ण र अनुत्तीर्ण भनेर छुट्टयाउनु व्यवहारिक नभएको र अन्तर्राष्ट्रिय प्रचलनमा समेत नरहेको तर्क गर्दै शिक्षा मन्त्रालयले यस पटकदेखि अक्षराङ्क प्रणालीमा नतिजा सार्वजनिक गरेको हो ।
अक्षराङक प्रणालीमा नतिजा सार्वजनिक गरिएको हुनाले यस वर्ष परीक्षामा सहभागीमध्ये ८० प्रतिशत भन्दा धेरै विद्यार्थी सहज रुपमा कक्षा एघार भर्ना हुन पाउने भएका छन् । नतिजा अनुसार एसएलसीमा नियमित तर्फ सहभागी भएका ४ लाख ३७ हजार ३ सय २६ जनामध्ये चार लाख ३२ हजार ३ सय १५ जना कक्षा ११ मा भर्ना हुन पाउनेछन् ।
अधिकतम ग्रेड प्वाईन्ट एभरेज (जिपिए) चार मानेर प्रकाशन गरिएको नतिजा अनुसार न्युनतम एक दशमलव ६ जिपीए सम्म ल्याउने विद्यार्थी कक्षा एघारमा भर्ना हुन पाउनेछन् ।
यी विद्यार्थीहरुले जीपीएमा गणना गर्दा न्युनतम एक दशमलव ६ भन्दा माथि र अधिकतम चारसम्म ल्याएका छन् । विगतका वर्षको नतिजासंग तुलना गर्दा यस पटक तीस नम्बरभन्दा माथि अङक ल्याउने विद्यार्थीले कक्षा एघार पढ्न पाएका छन् ।
पनिकाका अनुसार विगतका वर्षमा धेरै विद्यार्थी अनुत्तीर्ण हुँदै आएका विज्ञान, गणित र अंग्रेजीमध्ये यस पटक गणितमा सबैभन्दा धेरै विद्यार्थीले ए प्लस ल्याएका छन् ।
यो विषयमा २३ हजार ३ सय ३४ जनाले ए प्लस ल्याएका छन् । त्यस्तै अंग्रेजीमा १२ हजार ५ सय ५२ जना तथा विज्ञानमा ६ हजार ८ सय २७ जनाले ए प्लस ल्याएका छन् ।
प्रतिक्रिया दिनुहोस !
