शिवराज खत्री
अछामः बँदेलको आक्रमणबाट अछाममा तीनजना गम्भीर घाइते भएका छन् ।
शुक्रबार बिहान बँदेलको आक्रमणबाट मंगलसैन नगरपालिका-१० जुपुका ६० बर्षीय मानबहादुर बाग्पाल, २६ बर्षीय बमबहादुर रावल तथा कञ्चनपुर गुलरियाका ४८ बर्षीय पल्टुराम चौधरी घाइते भएका हुन् ।
मानबहादुर र पल्टुरामलाई बढी चोट लागेको र रावललाई भने उनीहरु भन्दा कम चोट लागेको प्रहरीले जानकारी दिएको छ ।
घाइतेको मंगलसेनमा उपचार सम्भव नभएपछि बयालपाटा अस्पताल रिफर गरेको जिल्ला अस्पताल अछामले जनाएको छ ।
घाइतेको शरीरका विभिन्न भागमा गम्भीर चोट लागेको छ । जंगलबाट आएर बँदेल स्थानीय प्रेम रावलको गोठमा पसेर राँगालाई घाइते बनाएपछि बँदेललाई लखेटने क्रममा आक्रमण गरेर उनीहरुलाई घाइते भएको स्थानीय नेत्र रावलले बताए ।
बँदेलले आक्रमण गरे लगत्तै मंगलसैन प्रहरी चौकीबाट प्रहरी टोली घटनास्थल पुगेको थियो ।
प्रहरी नायब निरीक्षक डम्बरबहादुर मल्लको नेतृत्वमा गएको टोलीले घाइतेलाई जिल्ला अस्पताल लगेको थियो । तीनजना घाइते बनाउँने बँदेललाई स्थानीयले घरेलु हतियार, ढुंगा र काठले कुटेर मारेका छन् ।
मारेको बँदेललाई लिल्ला वन कार्यालयको टोली गएर मुचुल्का गरी गाडेको अछामका प्रहरी प्रमुख निरंञ्जन दत्तभट्टले जानकारी दिए ।
प्रतिक्रिया दिनुहोस !
