सुर्खेतः सुर्खेतबाट सल्यानतर्फ जाँदै गरेको बस भेरी नदीमा खसेको छ । बस सल्यानको सल्लीबजार नजिकै भेरी नदीमा खसेको हो । दुर्घटनामा बसका मालिकको ज्यान गएको छ । यस्तै अरु दुई्जना गम्भीर घाइते भएका छन् ।
प्रहरीका अनुसार आइतवार बिहान सुर्खेतको धारापानीबाट सल्लीबजारतर्फ जाँदै गरेको ना ४ ख ५९४४ नम्बरको बस भेरीमा खसेको हो । दुर्घटनामा बसका मालिक सुर्खेतका रामबहादुर खड्काको ज्यान गएको हो ।
उनको उपचारका क्रममा नेपालगंजमा ज्यान गएको हो । यस्तै दुर्घटनामा बसका चालक सुर्खेतका मिलन रावत र सहचालक जाजरकोटका उमेशजंग शाह गम्भिर घाइते भएका छन् । उनीहरुलाई उपचारका लागि नेपालगञ्ज लगिएकोमा अहिले उपचार भइरहेको प्रहरीले जनाएको छ ।
इलाका प्रहरी कार्यालय देवस्थल सल्यानका अनुसार बस सडकबाट करिब दुई सय मिटर तल भेरी नदीमा खसेको हो । बसको ब्रेक फेल भएर दुर्घटना भएको हुनसक्ने अनुमान प्रहरीले गरेको छ ।
इलाका प्रहरी कार्यालय देवस्थल सल्यानका प्रमुख सई बालबहादुर थापाले बसमा तीनजना मात्र सवार रहेको बताए । बस नदीमा खसेपछि सुरक्षाकर्मी र स्थानीय बासिन्दाले उद्धार गरेका थिए ।
प्रतिक्रिया दिनुहोस !
