डोटीः रोजगारीका सिलसिलामा विदेश गए पनि सम्पर्कमा नआउँदा परिवारका सदस्यहरुमा नैराश्यता बढेको छ।
कफल्लेकी गाविस–६ तिछडाकी ईश्वरा नागरीका श्रीमान भारतमा गएको २१ वर्ष भइसक्यो ।
तर उनी अहिलेसम्म घरपरिवारको सम्पर्कमा आउनु भएको छैन । उनले श्रीमानको खोजी कार्य गरिदिन गाउँमा जाने सरकारी तथा गैरसरकारी निकायका प्रतिनिधिलाई गुहार्दैआएकी छिन्, तर समस्या जस्ताको तस्तै छ ।
कफल्लेकीकै दुर्गा नागरीका श्रीमान बेपत्ता भएको १९ वर्ष भइसक्यो । परदेशबाट गाउँमा नयाँ मान्छे आउँदा उनी झस्किन्छिन् । आश्वासनले उनी हैरान बनेकी छिन् । ‘आशा देखाउने धेरै आए, तर कुनै अत्तोपत्तो छैन,' उनले भनिन् ।
सरोकारवाला निकायले खोजी कार्य नगरिदिँदा उनीहरु चिन्तित बनेका छन् । खोजी गरिदिन विभिन्न प्रहरी चौकीमा दिएका निवेदन उपरसमेत प्रहरीले कारबाही अघि बढाएको छैन ।
कतिपय त दशकौदेखि सम्पर्कविहीन छन् । उनीहरुका आफन्त बाटो कुरिरहेका छन् ।
जिल्लाका धेरै गाविसबाट विदेश गएका नागरिक बेपत्ता भएका छन् । तर तथ्याङ्क कसैसित छैन ।
सहकारी डिभिजन कार्यालय सिलगढीमा कार्यरत कल्पना खत्रीका श्रीमान वेपत्ता भएको १५ बर्ष भन्दा बढी भईसक्यो । कुनै अत्तोपत्तो छैन ।‘अझै आश मारेकी छैन,' उनले भनिन् । श्रीमान खोज्न उनले भारतका विभिन्न सहर धाउन पुगिन । तर पत्तो लागेन ।
जिल्ला प्रहरी कार्यालयका अनुसार २०६३ साल असोज यता वैदेशिक रोजगारमा गई बेपत्ता हुनेको सङ्ख्या १२७ जना रहेका छन् ।
जसअन्तर्गत ७५ महिला, ३० पुरुष, १३ बालिका र ११ जना बालक रहेका छन् । बेपत्ता भएकाको उद्धार भए नभएको कुनै तथ्याङ्क नभएको प्रहरी उपरीक्षक डिल्लीराज विष्ट बताउछन् ।
‘समयमै उजुरी आउन्न, लामो समयपछि उजुरी आउँदा खोजीकार्य गर्न गाह्रो भएको छ,' विष्टले भने । रासस
प्रतिक्रिया दिनुहोस !
