कुश्माः सशस्त्र द्वन्द्वका पीडितले पूर्वराजा ज्ञानेन्द्र शाह र राप्रपा नेपालका अध्यक्ष तथा उपप्रधानमन्त्री कम थापाविरुद्ध पर्वतबाट उजरी दिएका छन् ।
सत्य निरुपण तथा मेलमिलाप आयोगले दश वर्षे जनयुद्धका क्रममा राज्य र तत्कालिन विद्रोही पक्षबाट पीडितपक्षलाई न्याय दिलाउनको लागि उजुरी संकलन गरिरहेका बेला पर्वतमा पूर्वराजा शाह र उपप्रम थापाविरुद्ध उजुरी दर्ता भएको हो ।
स्थानीय शान्ति समितिमा जिल्लामा द्वन्द्वकालमा भएका घटनाको छानबिन गरी न्यायको माग गर्दै पूर्वराज शाह र राप्रपा नेपालका अध्यक्ष थापाविरुद्ध कुश्मा नगरपालिका–१३ का रामप्रसाद पराजुलीले उजुरी दर्ता गरेका हुन् ।
द्वन्द्वकालको समयमा राज्यपक्षबाट खटाइएका सेनाले चलाएको गोली लागी घाइते भएको भन्दै ज्ञानेन्द्र र थापाविरुद्ध उनले उजुरी दर्ता गरेका हुन् । २०६२ चैत्र २६ गते काठमार्डाैंमा आफ्ना दुबै खुट्टामा गोली लागेको थियो ।
पर्वतमा हासम्म २ सय ६६ वटा उजुरी दर्ता भएका छन् । जसमध्ये १७ वटा वेपत्ता छानविन आयोग र २ सय ४९ वटा सत्यनिरुपण तथा मेलमिलाप आयोगमा परेको स्थानीय शान्ति समितिले जनाएको छ ।
स्थानीय शान्ति समितिमा द्वन्द्वकालका घटनाको उजुरी दिनेहरुको संख्या पछिल्लो दिनमा बढ्दै गएको हो । गत वैशाख ३ गतेदेखि असार मसान्तसम्म उजुरी दिन आयोगले आव्हान गरेपछि गाउँ गाउँमा रहेका पीडितहरु आउन थालेका छन् ।
उजुरी दिन आउनेमध्ये कतिपयले आफूले न्याय पाउने विश्वास गरेका छन् भने कतिपयले न्याय पाउने आश नभएपनि उजुरी भने दिएको बताएका छन् ।
उजुरी दिन विभिन्न सञ्चार माद्याममार्फत समेत प्रचार प्रसार तीब्र पारिएको छ । पर्वतमा माओवादी द्धन्द्धकालमा सुरक्षाकर्मी, माओवादी र अन्य पार्टी आबद्ध कार्यकर्ता गरी ९१ जनाको ज्यान गएको थियो ।
त्यसैगरी ४१ जना घाइते, एक सय पाँचजना विस्थापित, ६९ परिवारको सम्पत्ति लुटिएको र क्षति भएको स्थानीय शान्ति समितिको तथ्यांकमा उल्लेख गरिएको छ ।
प्रतिक्रिया दिनुहोस !
