ओखलढुंगाः एकजना व्यक्तिलाई पत्नीमाथि बलात्कार गरेको अभियोगमा अदालतले तीन वर्ष जेल सजाय सुनाएको छ ।
जिल्ला अदालत ओखलढुंगाले च्यानम गाविस–८ का २९ वर्षीय नारायणबहादुर वस्नेतलाई तीन वर्ष कैद र २५ हजार जरिवाना गर्ने फैसला सुनाएको हो ।
आफूलाई बलात्कार गरेको भन्दै पत्नीले दिएको जाहेरीमा सुनुवाइ गर्दै जिल्ला न्यायाधीश उद्धवप्रसाद भट्टराईको इजलासले ०७३ असार ५ गते तीन वर्ष कैद र २५ हजार जरिवाना गर्न आदेश दिएको हो ।
अदालतको आदेशले आरोपित यसअघि पुर्पक्षका लागि थुनामा रहेको जिल्ला प्रहरी कार्यालय ओखलढुंगाका प्रहरी निरीक्षक दिपककुमार साहले जानकारी दिए ।
उजुरीमा पतिले मादक पदार्थ पिएर कुटपिट गर्नुका साथै यौनजन्य हिंसा गर्ने गरेकाले उजुरी दर्ता गरेको पीडित महिलाले बताइन् ।
पीडितले ०७२ चैत १५ जबरजस्ती करणी गरेको जाहेरी गरेपछि प्रहरीले आरोपितलाई पक्राउ गरी चैत १८ गते जवरजस्ती करणी मुद्दा दर्ता गरेको थियो ।
ओखलढुंगामा पतिलाई पत्नीमाथि बलात्कार गरेको आरोपमा मुद्दा दर्ता भइ सजाय भएको यो पहिलो पटक हो ।
प्रतिक्रिया दिनुहोस !
