काठमाडौँ: नेपाली कांग्रेसले अफगानिस्तानको राजधानी काबुलमा भएको आत्माघाती आक्रमणमा १४ नेपालीको मृत्यु भएकोप्रति दुःख व्यक्त गरेको छ ।
सोमबार विज्ञप्ति सार्वजनिक गर्दै कांग्रेस सभापति शेरबहादुर देउवाले काबुलमा बम आक्रमणमा १४ नेपालीको मृत्युले राष्ट्र शोक विह्वल र उद्देलित भएको उल्लेख गरेका छन् ।
विज्ञप्तिमा भनिएको छ, ‘रोजगारिका लागि अफगानिस्तान पुगेका निर्दोष र निहत्था नेपालीको अत्यन्त पाशविक, क्रुर र बर्बर हत्याले आज हामी सम्पूर्ण नेपाली स्तब्ध र अत्यन्त दुःखी भएका छौँ ।'
देउवाले मृतक नेपालीप्रति श्रद्धाञ्जलि अर्पण गर्दै दिवंगत आत्माको चीर शान्तिको कामना गरेका छन् ।
‘घटनामा मृत्युवरण गर्नुभएका सबै नेपालीप्रति म हार्दिक श्रद्धाञ्जलि अर्पण गर्दछु, साथै दिवंगत आत्माको चीर शान्तिको कामना गर्दै उहाँहरुका परिवारजनप्रति हार्दिक समवेदना प्रर्कट गर्दछु र घाइतेको श्रीघ्र स्वास्थ्यलाभको कामना गर्दछु,' देउवाको विज्ञप्तिमा भनिएको छ ।
कांग्रेसले सधै आपराधिक घटनाको निन्दा र भत्सना गर्ने उल्लेख गर्दै विज्ञप्तिमा नेपाल र अफगानिस्तानले बेहोर्नु परेको शोकको घडीमा संयमका साथ एकजुट भएर अगाडि बढ्न समेत आग्रह गरिएको छ ।
प्रमुख प्रतिपक्षी दल कांग्रेसले मृतकको पार्थिव शरीर नेपाल फर्काउने व्यवस्था गर्न समेत सरकारसँग माग गरेको छ ।
देउवाको विज्ञप्तिमा भनिएको छ, ‘मृतकको पार्थिव शरीर यथाशीघ्र नेपाल फर्काउने व्यवस्था, घाइतेको उपचारको प्रबन्ध, मृतक र घाइतेका परिवारलाई उचित क्षतिपूर्तिको प्रबन्धका लागि कुटनीतिक पहल गर्न सरकारसँग माग गर्दछु ।'
प्रतिक्रिया दिनुहोस !
