गर्जुवाको बाढीले कोशी राजमार्ग अवरुद्ध
![गर्जुवाको बाढीले कोशी राजमार्ग अवरुद्ध](https://annapurnapost.prixacdn.net/media/albums/5769158e46abf4.16463168_Ez1fVnNAfa.jpg)
धनकुटाः गर्जुवा खोलामा आएको बाढीले कोशी राजमार्ग अवरुद्ध पारेको छ ।
मंगलवार विहान २ वजे भारी वर्षासँगै गिट्टी, बालुवा र ढुंगासहित आएको बाढीले महाभारत–२ स्थित गर्जुवा खोलाको पक्की पुल पुरेपछि १० घण्टा सडक अवरुद्ध भएको हो ।
केही समय राजमार्ग सञ्चालन भएपनि पहाडी क्षेत्रमा आइरहेको भीषण वर्षाले पुनः सडक अवरुद्ध पारेको डिभिजन सडक कार्यालयका सुपरभाइजर अमृता राईले बताइन् ।
राजमार्ग अवरुद्ध भएपछि धरानवाट कोशी पहाडी भोजपुर, संखुवासभा, तेह्रथुम र धनकुटा जिल्ला गुड्ने संयौ सवारी साधन गर्जुवा खोलामै अलपत्र परेका थिए । भने कोशी पहाडी जिल्लावाट तराई झर्ने गाडी पनि अलपत्र अवस्था रहेका थिए ।
एक्साभेटर, सडक हेरालु, स्थानीयबासी, जनपथ प्रहरी, सशस्त्र प्रहरी लगायतको सक्रियतामा सडकमा रहेको माटोलाई पन्छाएर अहिले एकतर्फी बाटो खुला गरिएको छ ।
बाढीले गर्जुवा पुल आसपासका आधा दर्जन घरहरु जोखिममा परेका छन् । जोखिममा रहेका घरबाहिरी भाग बाढीसँगै आएको माटोले पुरेको छ ।
हरेक वर्ष वर्खाको समयमा गर्जुवा खोलामा आउने बाढीले सडक अवरुद्ध पार्ने गरेको स्थानीयबासीको भनाइ छ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)