एजेन्सी
पेरिसः युरोकप फुटबलको मंगलबार राति हुने महत्वपूर्ण खेलमा जर्मनीले उत्तरी आयरल्यान्ड र पोल्यान्डले युक्रेनसँग प्रतिस्पर्धा गर्दैछन् ।
यी खेलको नतिजापछि मात्रै समूह ‘सी' बाट नकआउट चरणमा प्रवेश गर्ने टोलीको टुंगो लाग्ने भएका कारण एकै समयमा खेलिने यी खेल प्रतिस्पर्धात्मक र रोमाञ्चक हुने पक्का छ ।
समूह ‘सी' बाट प्रिक्वार्टरफाइनलको यात्रा तय गर्न जर्मनी र पोल्यान्ड दुवैलाई आआफ्नो खेलमा कम्तीमा बराबरीको नतिजा आवश्यक छ ।
तर पराजयले भने जर्मनी र पोल्यान्डमध्ये एक टोली समूहगत चरणबाटै बाहिरिने सम्भावना छ । त्यसैले बलियो टोली भएर पनि समूहगत चरणको अघिल्लो दुई खेलमा गतिलो प्रदर्शन दिन नसकेका जर्मनी र पोल्यान्ड मंगलबारको खेल अघि दबाबमा छन् । अझ विश्व च्याम्पियन जर्मनीले बढी दबाब महसुस गरेको हुनुपर्छ ।
समूह ‘सी' बाट जर्मनी र पोल्यान्डसँगै आयरल्यान्डको समेत नकआउट चरण प्रवेशको सम्भावना छ ।
जर्मनीलाई पराजित गर्न सकेको अवस्थामा उत्तरी आयरल्यान्ड प्रतियोगिताको अन्तिम १६ मा पुग्नेछ । जर्मनीस“ग बराबरीमा रोकिएको अवस्थामा समेत अर्काे खेलमा युक्रेनले पोल्यान्डलाई पराजित गरे, आयरल्यान्डको भाग्य खुल्न सक्छ ।
त्यसैले युक्रेनविरुद्ध उत्कृष्ट प्रदर्शन देखाएको उत्तरी आयरल्यान्डले जर्मनीविरुद्ध पनि त्यो प्रदर्शनलाई दोहोर्याएर महत्वपूर्ण उपलब्धि हात पार्न सक्छ ।
यसअघिको प्रतिस्पर्धालाई आधार मान्दा उत्तरी आयरल्यान्डका लागि जर्मनी निकै बलियो प्रतिद्वन्द्वी हो । एक अर्काविरुद्ध अहिलेसम्म भएको १४ खेलमध्ये जर्मनीले आठ खेलमा जित हात पारेको छ ।
चार खेल बराबरीमा सकिएको छ भने दुई खेलमा उत्तरी आयरल्यान्ड विजयी भएको छ । उत्तरी आयरल्यान्डले हात पारेको जितसमेत निकै पहिलेको हो ।
सन् १९८४ को युरोकप छनोटमा उत्तरी आयरल्यान्डले जर्मनी (तत्कालीन पश्चिम जर्मनी) लाई दुईपटक समान १–० गोलले हराको थियो ।
इतिहासमा समेत कमजोर देखिएको पोल्यान्डलाई भने वर्तमानमा पनि युक्रेनस“ग सचेत रहनुपर्ने अवस्था छ । प्रतियोगिताबाट यसअघि नै बाहिरिइसकेको युक्रेनको एउटैमात्र उद्देश्य हुनेछ, जितसहित प्रतियोगिता टुंग्याउने ।
यो अवस्थामा कुनै पनि दबाबबाट मुक्त रहेको युक्रेनले पोल्यान्डको अगाडिको बढ्ने बाटो रोक्न पनि सक्नेछ । यसअघि एकअर्काविरुद्ध भएका सात भिडन्तमा समेत युक्रेनले गर्विलो प्रदर्शन गरेको छ । सातमध्ये तीन खेलमा युक्रेन विजयी भएको छ भने दुई खेलमा पोल्यान्ड विजयी बनेको छ । दुई खेल बराबरीमा सकिएका छन् ।
क्रोएसियालाई मुस्किल
बुधबार बिहान समूह ‘डी' को अन्तिम खेलमा स्पेन र क्रोएसिया तथा चेक गणतन्त्र र टर्कीले पनि एकआपसमा प्रतिस्पर्धा गर्दैछन् ।
यी खेलको नतिजापछि समूह ‘डी' बाट नकआउट चरणमा पुग्ने दोस्रो टोलीको टुंगो लाग्नेछ । स्पेन यसअघि नै प्रिक्वाटरफाइनलमा प्रवेश गरिसकेको छ । अब क्रोएसिया र चेक गणतन्त्रमध्ये एक टोली अगाडि बढ्नेछ । यद्यपि पछिल्लो समीकरणअनुसार त्यो सम्भावना पछ्याउन चेक गणतन्त्रलाई सहज छ ।
प्रतियोगितामा उपाधिकै दाबेदार मानिएको स्पेनले सबै टोलीविरुद्ध राम्रो प्रदर्शन गर्दै आइरहेको छ । अर्कोतिर चेक गणतन्त्रले भने हालसम्म एक खेल पनि नजितेको टर्कीलाई अन्तिम प्रतिद्वन्द्वी पाएको छ ।
यसअघिको प्रतिस्पर्धामा समेत स्पेनविरुद्ध क्रोएसिया निकै कमजोर देखिएको छ । स्पेनले क्रोएसियाविरुद्ध सन् २०१२ को युरो कपमा १–० को जित हात पारेको थियो ।
यद्यपि क्रोएसियाविरुद्ध स्पेन पछिल्लो २२ वर्षयता अपराजित छ । त्यसैले नकआउट चरण प्रवेशका लागि स्पष्ट जितकै आवश्यकता रहेको क्रोएसियालाई स्पेनको चुनौती पन्छाउन मुस्किल देखिन्छ ।
यस्तो अवस्थामा चेक गणतन्त्रले तुलनात्मक रूपमा कमजोर देखिएको टर्कीलाई पराजित गर्दै अन्तिम १६ को यात्रा पक्का गर्न सक्ने सम्भावना छ ।
चेक गणतन्त्रले टर्कीविरुद्ध यसअघिका प्रतिस्पर्धामा पनि गतिलो प्रदर्शन गरेको छ । हालसम्म यी दुईबीच भएका नौ खेलमध्ये चेक गणतन्त्रले टर्कीलाई पा“च खेलमा हराएको छ भने तीन खेलमा पराजित भएको छ।
एक खेल बराबरीमा सकिएको छ । पछिल्लो पटक सन् २००८ को युरोमा टर्कीले चेक गणतन्त्रलाई ३–२ गोलले हराएको थियो ।
प्रतिक्रिया दिनुहोस !
