सुर्खेतः नक्कली लालपूर्जा (जग्गा धनी प्रमाणपत्र) बनाउँदै ठगी गरेको आरोपमा सुर्खेतमा एकजना पक्राउ परेका छन् ।
पीडितको उजुरीको आधारमा प्रहरीले वीरेन्द्रनगरबाट एकजनालाई पक्राउ गरेको हो । सरकारी छाप र दस्तखत किर्ते गरेको आरोपमा वीरेन्द्रनगर–५ निवासी २८ वर्षीय निराजन रानालाई प्रहरीले पक्राउ गरेको हो ।
पीडितले उजुरी दिएपछि रानालाई मंगलवार घरबाटै प्रक्राउ गरिएको प्रहरीले जनाएको छ । पक्राउ परेका रानाले एक वर्षअघि दैलेखको खरीगैरा निवासी पवित्रा थापालाई नक्कली लालपूर्जा बनाएर जग्गा बिक्री गरेका थिए ।
थापाले केही दिन पहिले जग्गाको खोजी गर्दा जग्गा नभेटिएको र मालपोत कार्यालयमा लालपूर्जा देखाउँदा नक्कली भएको रहस्य खुलेको थियो । लालपूर्जा नै नक्कली भएको खुलेपछि उनले प्रहरीमा उजुरी दिएकी थिइन् ।
सोही उजुरीको आधारमा रानालाई पक्राउ गरेर थप अनुसन्धान भइरहेको जिल्ला प्रहरी कार्यालयले जनाएको छ । सुर्खेतका प्रहरी प्रवक्ता डीएसपी बहादुरजंग मल्लका अनुसार रानाले नक्कली लालपूर्जा बनाएको प्रमाण भेटिएको छ ।
‘नक्कली लालपूर्जा देखाउँदै ठगेको पाइयो, पीडितहरुले न जग्गा पाए न लालपूर्जा । जिल्लामा ठूलो गिरोह नै नक्कली धन्दामा सक्रिय रहेको तथ्य फेला पारेका छौं’, डीएसपी मल्लले भने, ‘अब हामी यसमा अप्रेसन गर्दैछौं ।’ उनले सरकारी छाप र दस्तखत किर्ते गरेको मुद्दामा रानालाई कारबाही प्रक्रिया अगाडि बडाइने जानकारी दिए ।
सुर्खेतमा हुँदै नभएको जग्गा देखाउने र नक्कली लालपूर्जा देखाएर सर्वसाधारणलाई ठग्ने गिरोह सक्रिय रहेको प्रहरीको भनाइ छ ।
‘किर्ते काममा अरु व्यक्तिहरु पनि संलग्न रहेको संकेत मिलेको छ’, डीएसपी मल्लले थपे, ‘हामीलाई यसको सूचना पनि प्राप्त भएको छ । हामी अब यसको खोजी गर्छौं ।’ प्रहरीले जिल्लामा अन्य धेरै व्यक्तिहरु पनि नक्कली लालपूर्जामा ठगिएको हुनसक्ने आशंका व्यक्त गरेको छ ।
प्रतिक्रिया दिनुहोस !
