बाह्रबिसेः कांग्रेस सिन्धुपाल्चोकको जिल्ला अधिवेशनमा मतदान चल्दै गर्दा दुई पक्षीय कार्यकर्ताबीच झडप भएको छ। मतदानस्थलबाहिर दुई उम्मेदवारका समर्थकहरूबीच सामान्य विवाद भएपछि झडप भएको हो ।
सभापति उम्मेदवार हरिशरण श्रेष्ठका समर्थक महासमिति सदस्य विष्णु खत्री तथा क्षेत्र नं १ का सभापति बालकृष्ण बस्नेतले भूपेन्द्रबहादुर थापाका समर्थक महाधिवेशन प्रतिनिधि बलदेव तिमिल्सिना र युधीर पौडेललाई हातपात गरेका प्रत्यक्षदर्शीले बताए ।
झडपका क्रममा तिमिल्सिनाको कपडा च्यातिएको थियो । प्रत्यक्षदर्शीका अनुसार खत्रीले तिमिल्सिनालाई तँ भनेपछि विवाद सुरु भएको थियो ।
विवादकै क्रममा खत्री आक्रमणमा उत्रिएका थिए । खत्रीलाई अन्य कार्यकर्ताले छेकेपछि तिमिल्सिना र पौडेललाई बस्नेतले आक्रमण गरेका थिए । झडपमा अन्य कार्यकर्ता बीचमा आएकाले गम्भीर घटना हुन नपाएको प्रत्यक्षदर्शी बताउँछन् ।
अर्को उम्मेदवारलाई समर्थन गरेकै कारण आफूमाथि आक्रमण गरेको तिमिल्सिनाले बताए । आन्तरिक विवाद र सामान्य घटना भएको कांग्रेस कार्यकर्ताहरू बताउँछन् । सामान्य झडप भएको स्वीकार्दै नेपाली कांग्रेसका केन्द्रीय सदस्य मोहनबहादुर बस्नेतले यसलाई ठूलो रूपमा लिन नहुने बताए ।
घटनालाई कसरी लिने भन्ने विषयमा थापा समूह बुधबार साँझ मत परिणाम सार्वजनिक भएपछि छलफलमा जुटेको छ । ‘घटनालाई कसरी लिने भन्ने विषयमा छलफल भइरहेको छ’, तिमिल्सिनाले भने, ‘ममाथि आक्रमण भएको हो । सबै साथीभाइसँग छलफल गरेर कानुनी प्रक्रियामा जान्छौं । आफूले सम्मान गर्दागर्दै आफूमाथि जाइलागेकाले नियोजित रूपमै आक्रमण भएको तिमिल्सिनाको दाबी छ ।
अधिवेशनमा तीन उम्मेदवारमध्ये कसैले पनि ५१ प्रतिशत मत नल्याएपछि बिहीबार अर्को निर्वाचन हुने भएको छ । अधिवेशनमा विकास लामा दुई सय ४६ मत ल्याएर प्रथम भएका छन् । उनी पौडेल पक्षका हुन् । देउवा पक्षका हरिशरण श्रेष्ठले दुई सय ३८ मत ल्याएर दोस्रो भएका छन् भने पौडेल पक्षकै भूपेन्द्रबहादुर थापा दुई सय २८ मत ल्याएर मतदान प्रक्रियाबाट बाहिरिएका छन् ।
प्रतिक्रिया दिनुहोस !
