पेरिस: जारी युरोकप फुटबल प्रतियोगितामा आफ्नो टोली पोर्चुगलले समुहगत चरणमै जितका लागि संघर्ष गर्नुपरेपछि त्यसको सबैभन्दा बढी दबाब कप्तान क्रिस्टियानो रोनाल्डोलाई परेको छ ।
रोनाल्डोले त्यही दबाबलाई आक्रोशकारुपमा पत्रकारसँग पोखेका छन् । रोनाल्डोले बुधबार हंगेरीविरुद्धको खेलअघि आफूसँग अन्तर्वाता लिन आएका सञ्चारकर्मीमाथि दुर्व्यवहार गर्नसमेत पछि परेनन् । रोनाल्डोले ती सञ्चारकर्मीको माइक्रोफोन नै खोसेर नजिकै रहेको पोखरीमा फ्याँकिदिए ।
रोनाल्डो पेरिस नजिकै रहेको आफु बसेको होटल परिसरमा आफ्ना सहकर्मीसँगै पोखरीतिर घुम्न निस्किएका थिए । त्यसैबेला पोर्चुगिज भाषा बोल्ने एक सञ्चारकर्मी उनी नजिक पुगेर प्रश्न गर्न थाले । ती सञ्चारकर्मीले ‘के तपाईँ हंगेरीविरुद्धको खेलका लागि तयार हुनुहुन्छ ?’ भनेर रोनाल्डोसँग प्रश्न सोधेका थिए । तर रोनाल्डोले ती सञ्चारकर्मीको प्रश्नको जवाफ दिएनन् ।
रोनाल्डोले ती सञ्चारकर्मीको प्रश्नको उपेक्षा गरेनन् मात्रै, ती सञ्चारकर्मीले बोकेको माइक्रोफोनसमेत खोसेर नजिकैको पोखरीमा फ्याँकिदिए ।
त्यसपछि रोनाल्डो आफ्ना सहकर्मीसँगै त्यहाँबाट निस्किए । जारी युरोकप फुटबलमा टोलीलाई अगाडी बढाउन नसकेपछि रोनाल्डो निकै दबाब र तनावमा देखिएका थिए । पोर्चुगल प्रतियोगिताको समुहगत चरणको आफ्नो सुरुवाती दुई खेलमा जितबिहीन बनेको थियो ।
तर रोनाल्डोले समूह चरणको अन्तिम खेलमा हंगेरीविरुद्ध दुई गोल त गरे जित भने दिलाउन सकेनन् । यद्यपि पोर्चुगल तीन खेलमै बराबरी खेल्दै उत्कृष्ट तेस्रो चार टीममा परेर अन्तिम १६ मा पुग्न सफल भयो ।
पोर्चुगलले आइसल्यान्डसँग १–१ र अष्ट्रियासँग गोलरहित बराबरी खेल्दा रोनाल्डोले टोलीका लागि गोल गर्न सकेका थिएनन् ।
जारी युरोकपमा टोलीका दुई खेलमा लागि गोल गर्न असफल बनेका रोनाल्डोले तेस्रो खेलमा गोल गरेपनि दुई गोल गरे । पहिलो खेलमा बिपक्षी टोलीविरुद्ध नकारात्मक टिप्पणी गरेर उनी आलोचित बनेका थिए ।
रोनाल्डोले आइसल्यान्डले पहिलो खेल बराबरीमा टुंग्याए पनि युरोकप नै जितेजस्तो गरी खुसीयाली मनाएको प्रतिकृया दिएका थिए ।
रोनाल्डोले आइसल्यान्डले खेल अवधिभर रक्षात्मक खेल खेलेको र फुटबलमा त्यो संकीर्ण मानसिकता भएको तर्क पनि गरेका थिए ।
त्यसको पाँच दिनपछि अष्ट्रियाविरुद्ध पेनाल्टी प्रहारको अवसर समेत सदुपयोग गर्न नसकेपछि रोनाल्डोको थप आलोचना भएको थियो ।
पेनाल्टी प्रहारमा समेत गोल गर्न चुकेपछि पोर्चुगल महत्वपुर्ण खेलमा अष्ट्रियासँग गोलरहित बराबरीमा रोकिएको थियो ।
प्रतिक्रिया दिनुहोस !
