काठमाडौंः अघिल्ला दुई खेलमा गोल गर्न नसकेर आलोचित कप्तान तथा स्ट्राइकर क्रिस्टियानो रोनाल्डोको दुई गोलसँगै पोर्चुगल युरोकपको प्रिक्वार्टरमा पुग्न सफल भएको छ ।
दुबै टीमबाट गोलको वर्षा भएको हंगेरीसँगको खेलमा रोनाल्डोले दोस्रो हाफमा दुई गोल गरे ।
रोनाल्डाले खेलको ५० औं र ६२ औं मिनेटमा गोल गर्दै आलोचकहरुको मुख थुन्न सफल भए । यसअघि खेलमा अग्रता भने हंगेरीले लियो ।
हंगेरीले १९ औं मिनेटमा जोल्टान गेराको गोलमा अग्रता लिएको थियो । तर खेलको ४२ औं मिनेटमा रोनाल्डोको पासमा नानीले गोल गर्दै खेललाई बराबरी गरे ।
पहिलो हाफ बराबरीमा सकिएको अवस्थामा दोस्रो हाफको सुरुमै हंगेरीले अग्रता लियो । उसका लागि ४७ औं मिनेटमा ड्युस्तुडुज्सकले गोल गर्दै अग्रता दिलाए ।
त्यसपछि ५० औं मिनेटमा रोनाल्डोको गोलमा पोर्चुगलले बराबरी गर्यो । फेरि ५५ औं मिनेटमा ड्युस्तुडुज्सकले नै गोल गर्दै हंगेरीलाई ३–२ को अग्रता दिलाए ।
तर, यो पटक रोनाल्डो रोकिएनन् । उनले ६२ औं मिनेटमा हेडमार्फत गोल गर्दै युरोकपमा अन्तिम १६ को ढोका खोले ।
पोर्चुगल तेस्रो स्थानका उत्कृष्ट चार टीममा पर्दै अघि बढेको हो । अब पोर्चुगलले अन्तिम १६ मा शनिबार क्रोएसियासँग प्रतिस्पर्धा गर्नेछ ।
प्रतिक्रिया दिनुहोस !
